Den Sendtbrief Pauli tot den Romeynen

op stichtsanghen gheset

Inhout van het I I I. Capittel.

Doort geloof, wt genade, wert den mensch rechtueerdich,
So Heyden als Iode, hy aensiet geen persoon,
Abrahams geloof, maecte hem voor God eerweerdich,
Niet wt verdiensten, maer wt de ghenade schoon.

Den derden stichtsanck op de wijse, Nv looft mijn siel den Heer.

4 GOd wort in als beuonden
Warachtich hier tot elcker tijt.
En aller menschen monden
Leugenachtich, hoe elck hem mijt.
Daer is nyemant rechtueerdich,
Daer isser oock niet een
Verstandich noch meeweerdich,
Die God soect daer is geen.
Sy zijn al af geweken.

[fol. A6v]

 

 

12 En zijn alle onnut,

 

Daer is niet een gebleken

 

Die goet doet ende straf beschut.

 

 

 

13 Haer kelen sy op luycken

 

Ghelijck een diep stinckende graf:

 

Haer tonghen sy ghebruycken

 

Bedrochlijck, gheen goet coemt daer af.

 

Den lippen tfenijn wt springt

 

Des slanghen boos verwoet,

 

14 Den mont oock vloecken voort bringt,

 

Den voet stort snellijck bloet,

 

15 Vernielingh' in haer weghen

 

16 Nyemant op den wech slaet

 

17 Des vredes, noch te deghen

 

18 Gods vreese voor haer ooghen staet.

 

 

 

19 De wet die hoortmen spreken

 

Tot de gheen die daer onder staen,

 

Op dat ghestopt [versteken]

 

Sy alle mont [met sulck vermaen]

 

En oock de werlt ghemeyne

 

Voor God verdoemlijck sy:

 

20 Daerom gheen vleesch hoe reyne

 

En wort door tswets werck vry,

 

Maer toont kennis van sonde.

 

21 Maer nv is voor gheset

 

Gerechtheyt t'deser stonde

 

Betuycht van Propheet ende wet.

 

 

 

22 Rechtueerdicheyt is comen

 

Door het gheloof in Christo vast,

 

En coemt op allen vromen

 

Daert werct [en op de liefde past.]

[fol. A7r]

 

23 Ghesondicht hebbens' allen

 

Daer is gheen onderscheyt,

 

Daerom sy zijn gheuallen

 

Van Godes heerlijckheyt:

 

24 Maer twort nv wt ghenaden

 

Weder ghebracht om niet,

 

Door soeningh' en weldaden

 

Jesu Christi aen ons gheschiet.

 

 

 

25 Den welcken God de Vader

 

Tot een versoeningh' heeft ghestelt,

 

Tsgheloouighen ontlader

 

Door zijn bloet: ende hy ontghelt

 

Voor de sonden voorleden,

 

26 Welck God verdraghen heeft,

 

Om zijn gherechticheden

 

Te toonen al dat leeft,

 

Datmen hem vinden soude

 

Gherechtich in zijn saeck,

 

En die te recht betroude,

 

In Christo hy rechtueerdich maeck.

 

 

 

27 VVaer sal den roem dan wesen ?

 

Hy is wech door t'sgheloofs wet recht:

 

28 So houden wy door desen,

 

Dat de mensche, tsy heer oft knecht,

 

Rechtueerdich door tghelooue

 

Wort, sonder des Wets werck,

 

[Niemant God zijn eer rooue].

 

30 Hy is eenich God sterck:

 

Wy maken niet te niete

 

31 Door het gheloof de Wet,

 

Die God door Mosen liete,

 

Maer wy verstercken die daer met.