Den Sendtbrief Pauli tot den Romeynen
(1582)–Johan Fruytiers–
Auteursrechtvrijop stichtsanghen gheset
[Folio A3r]
| |
Den eersten stichtsanck op de wijse: Het is dat heyl ons comen her, &c. 1 ICk Paulus Jesu Christi knecht, Ga naar margenoot+
Geroepen en vercoren,
2 Te prediken het woort te recht,
Gepropheteert te voren
3 Van Jesu Christo onsen Heer,
Hier nae den vleesche swac en teer,
Wt Dauids zaet geboren.
4 Seer crachtlijck is hy na den gheest
Gods sone oock bewesen:
Die ons heylich maeckt alder meest,
Na dat hy is verresen,
| |
[Folio A3v]
| |
Des derden daechs weer vander doot,
Door hem is de ghenade groot
Op ons [hy sy ghepresen.]
8 VVy dancken van tghelooue al
Hem diet gheeft menichfuldich,
Men spreeckt daer van int aertsche dal
Elck sy Christum ghehuldich,
Tsgheests gauen deylt en willich werckt,
14 Den Griecken als Barbaren sterckt
Ghy zijts' oock alle schuldich.
16 En schaemt v tEuangely niet,
Een cracht Gods hooch verheuen:
Gheloouighen het heyl aenbiet,
Meer wort dan noch ghegheuen:
Gherechticheyt wort v ontdect,
17 Want de gherechtighe [perfect]
Sal wt tghelooue leuen.
18 Den toorne Gods hem openbaert
Ouer de goddeloosheyt,
En ouer ongherechten aert
Der menschen vol van broosheyt,
19 De ghene die de waerheyt puer
In ongherechtheyt telcker uer
Onthouden door haer boosheyt.
20 De moghentheyt en Godheyt goet
In God hier onsienlijcke,
Wortmen wt tswerelts schepsel vroet,
Neemt voorder gheen wijcke:
Want door de creatueren fijn
Can de Schepper wel bekent zijn
Een God van tshemels rijcke.
21 Die hem hier door niet heeft bekent,
Ghedanckt, noch betoont eere,
Die is tot ydelheyt ghewent
| |
[Folio A4r]
| |
In zijn ghedachten seere:
En oock zijn onuerstandich hert
Daer bouen heel verduystert wert
[Ons allen tot een leere.]
22 Daer sy hem in hielden voor wijs
Daer is dwaesheyt ghebleecken:
23 Gods heerlijckheyt die toe coemt prijs,
Die hebben sy gheleecken
By eenen beelde twelck vergaet.
24 Daerom gaf God haer met der daet
In tslusts onreyn ghebreecken.
25 Sy hebben zijne waerheyt reyn
Verandert in de loghen,
En tschepsel ghedient al ghemeyn,
En oock de eer ontoghen
Der Goddelijcker Maiesteyt,
Die den prijs coemt in eewigheyt
[Selfs zijn sy meest bedroghen.]
28 Ghelijck sy niet hebben bedocht
Om Gods kennis te winnen,
Sijnse door ouergift ghebrocht
In onbedochte sinnen.
29 Vol onrechts, hoerdom, giericheyt,
Nijt, moort en onmaniericheyt,
Tquaet sachmen haer beminnen.
30 Oorblasers, achterclappers fel,
Met Gods haet haer te minghen,
Versmaders, seer hooch int opstel,
Vinders van boose dinghen:
Den ouders heel onghehoorsaem,
31 Verstandeloos en onbequaem
Om liefde te volbringhen.
32 Sy weten Gods recht: elck verstaet
Dat dees die haer dus draghen,
| |
[Folio A4v]
| |
Oock waerdich hier zijn al het quaet
Des doots, en felle plaghen:
Noch zijnse daerenbouen coen,
En hebben in de gheen diet doen
[Int hert] een wel behaghen.
|
|