Mastreechter veerskes

[p. 155]

Jaan en Greet.

(Simrock: Rheinische Sagen).

In Weert dao is et ins gescheed
Dao woende 'n ambachsmaan,
Dee had en dochter, dat waos Greet,
'Ne knech dee hèdde Jaan.

Die Greet dat waos en frisse pùl
'Ne kop wie mèlk en blood;
Dee Jaan dat waos 'ne knappe snùl,
Nog jònk, mer toch vol mood.

Ins zag zich Jaan: die Greet is schoen,
Zoe get nao mine wins.
Er gòng nao Greet en zag heùr toen:
‘Och Greet, bezuug mich ins!

Num mich veur maan; ich bin mer knech,
En dich, de bis neet riik;
Ich lap al scheun, dich nêis neet slech,
De zuus, ver ziin geliik.

De spaanreem van de vajer kint
De maot van mine rùk;
Mer ins getrouwd, heet dat ein ind,
Dich liers mich et gelùk.’

Mer Greet die zag: ‘Verstaon ich rech?
Ich bin van bùrgerlui,
En dich, de bis mer ene knech,
Dich pas en Trijn of Trui.

[p. 156]

 

Ich bin neet riik, onnuus'le blood,

 

Mer toch get miejer weerd;

 

'Nen halfingszoon is neet te good

 

Mèt al zen keui en peerd.’

 

 

 

Wie Jaan dat hoort, dee gruutse praot,

 

Stond heer bedonderd dao;

 

Er leep eweg en woort soldaot,

 

En maakden et denao.

 

 

 

Er hòng de bies dao oet genòg,

 

Mê'r sloog zich wie 'nen held;

 

Er schuimde 't land van vreemde bòg

 

En wònt veùl ier en geld.

 

 

 

En wie er kaom terùk nao Weert,

 

Doe zaog me wònder op,

 

Want Jaan dee waos gechamareerd

 

Mèt pluimen oppe kop.

 

 

 

Er zaot te peerd; van allemaol

 

Woord heer gesalueerd,

 

Want Jaan dee waos noe generaol,

 

De groete Jaan van Weert.

 

 

 

En toen er langs de merret kaom

 

Zaot op ein van de heuk

 

Eus Greet veur enen appelkraom,

 

Mèt fruit en oliekeuk.

 

 

 

Mer wie er Greet geware woord,

 

Leet heer ze peerd stèl stoon,

 

En zag, dat eederein et hoort:

 

‘Greet, hêiste 't mer gedoon.’

 

 

[p. 157]

 

Die stum die klònk aon Greet zoe zach;

 

Zij ouch erkaant de maan,

 

Ze leet 'nen deepe zùch en zag:

 

‘Hêi 'ch dat gewete, Jaan!’

 

 

 

Drum, meidskes, dink, ier et uch spit,

 

Dat gruutsigheid neet baat;

 

Die veur Sint Annakäske zit

 

Berouwt et zich te laat.

 

 

 

En kump dao eine dee uch wèlt,

 

Noe dan, versmiedt em neet;

 

Ger krijg dèks neet woe geer op tèlt,

 

Liert dat van Jaan en Greet.