Mastreechter veerskes

[p. 101]

Kom, schink de glazer vol!

In 't glaas dao spiegelt zich de vreùg,
Dat is genòg bekind!
Drum pak me zich mer teùg op teùg
Tottat me ze d'rin vindt.
Dan krijg men in zen oug en vleeg,
Mer men is lùstig dol.
Me drink altiid ze gleeske leeg
En schink et zich weer vol.

Et spreekwoord zeet: pas oppe kraom;
Dus gaot mer neet te veer,
En drink neet boete maot of schraom;
Mê e ruuschke deit plezeer.
Dan vindt me nog de rechte weeg,
De kop is neet op hol,
Al drink men ouch ze gleeske leeg,
En schink et zich weer vol.

In 't drinke waos eus stad verneump,
Dao zat men et in door.
Et paotersveetje waos bereump,
Wie ouch de Cellebroor.
Veer ouch ziin jonges van Mastreech
En tèlle neet veur nol.
Mer wat! eus glazer die stoon leeg,
Kom, schink ze dan weer vol.

Mei 1871.