De conclusie der remedien teghen die sonde der giericheyt.
GHy sult lichtelijck aflaten dat gelt te achten ende te prijsen, ist dat gy neerstelic doorkent ende onderscheyt de warachtige goeden met de valsche goeden, ende de beveynsde profijten met de warachtighe profijten. Ende ist dat ghy leert aenschouwen, ende lief hebben dat alder overste goet, welck alst alleen teghenwoordich is, soo vervultet over vloedich dat herte der menschen, also seer dattet met alle die goeden deser wereldt alsoo niet versaet en mach worden. Ist oock dat ghy dickmaels voor ooghen hebt hoedanich dat die aerde u ontfanghen heeft, doen ghy eerst gheboren waert, ende hoedanich datse u weder sal ontfanghen als ghy sterft. Ende neemt in uwe ghedachten ende overleght van de sodt daer dat Euangelie af seyt: Van dese nacht sullen sy u siel van u wech nemen, ende dese goeden die ghy vergaderdt hebt wie sullen die toebehooren? Ende ist dat ghy u hert afftelt van de boose ende verkeerde wercken ende gewoonten des ghemeyn volcx tot die armoede van Maria, der Apostelen, der Martelaren, ende aldermeest uwes hoofts Christi, ende dat ghy stelt altijt dat vreesselijck woort in uwer herten, met welck woordt Christus heeft ghedreycht die rijcken deser werelt.
Auteursrechtvrij