Tondalus' visioen en St. Patricius' vagevuur (2 delen)

Innighen raet van den ghenen die dit int latijn maecte.

Hier omme lieven broders laet ons rekenen dit liden van desen levene. teghens die pinen ende onsalicheiden vanden voersegheden steden. Want ist dat men die ene teghens die ander weghet in die waghe der ghedachten. soe sal alse die menicheit des ontelliken sandes van der se. gherekent teghen enen sachten regen. die ontellike onsalicheit van dien pinen swaerre openbaren. Alse ic wane so en sal niement. van ghesonder

[fol. 19b]

ghedachten ghenoechte hebben inden vleyscheliken begherten. also lange als hi dese pinen merct mit suveren ansiene der ghedachten. Ende deent swaer ende [...] scherp dunct sijn vertien. of overgheven om cristus willen in enen cloester. hi bedenke des bidde ic hem. hoe bitter is hare lange pine in dien pinen. Ontellic is lichter dat leven van den cloester ende die scherpheit van alte nauwer regulen Discipline van den cloestere daer men sueket die noetdurfte. beide des lijfs ende der sielen. sonder sorchvoldicheit vanden voergesegheden steden van pinen. indeen welken, alse men ghelovet, die onsalighen voer hoer sunden, die sie in desen leven niet ghebetert en hebben. al en sin sie nochtan niet die meeste sunden. mer oec voer die alre minste. die men vermits rueckeloesheit ghedaen hevet. menichvoldelic mit langer onselicheit ghepijnt werden. Want tsin sunden die men secht dat herde cleyne ende licht sin Niet dat si cleyne of licht sin. mer om [...] dat sie in desen levene den ghenen die warachtich berouwenisse hebben. lichtelic

[fol. 20a]

van onsen heren vergheven werden. Ende ist dat sie iement overholt tot hier na veronweerdende dat hi [se] beteren solde. die en sal sie niet licht. mer swaer ghevoelen inden pinen. Niement en bedrieghe hem selven vander lichtheit van sinen lichten sunden. hem selven te troestene om dat sie licht heten. Want hoe si lichter sin hoe si meerre werden voer den aenghesichte des scherpen richters. ist dat men vermids ruekeloesheiden versumet te beteren