Tondalus' visioen en St. Patricius' vagevuur (2 delen)

Van conick karmathus huus

[fol. 158d]

ENde doe sij een luttel voerwaerts ghingen. soe sagen sij een [...] huus wonderlic versciert Ende die wande ende elcke ghestichte daer af waren van finen golde, van silver ende van allen manieren der kostelre ghesteenten. Mer daer en waeren gheen vinsteren [an]. noch doeren. Ende nochtant alle die daer in gaen wolden die ghingen daer in Ende dit huys was binnen alsoe claer Als ofter niet alleen een sonne in gheschenen en had mer voel sonnen Ende het was herde wijt ende ront. ende mit genen colommen ondersat Ende het was bynnen ghefloert

[fol. 159a]

mit golde. ende duer stenen. Doe die ziel genoechte had in desen ghetymmere. soe sach si al om ende [...] sach enen guldene stoel. die versciert was mit perlen. Ende sy sach den coninck kormathum, hoeren here, inden throen sitten ghecledet mit sulken clederen. daer hy nye mede gecleet en was. noch geen coninc vander werelt en mocht gecleet werden Ende doe dese ziele verwonderde een luttel staende bleef Soe quamen veel persoenen in dat huus mit ghiften tot den coninck Ende elck gaf hem sijn gaven mit blijt\scappen

[fol. 159b]

Ende doe sij lange stonden voer den coninck [hoeren heer]. Want hij was hoer heer doe sij beide levede in deser werelt Soe quamen voel priesteren ende diakone hoechlic gecledet als ter myssen. beide mit sidene casoffelen ende myt anderen ghewade herde groet Ende men vercierde over al dat coninclike huus mit wonderliker behae[...]gelheiden. Si settede nappen ende gulden. ende silveren koppen. Ende elpenbenen bussen op tresoren ende op tafelen Ende aldus vercierde men dat huus. Als of geen meere glorie en weer inden rijcke gods. dat schijnen

[fol. 159c]

mocht dat dit genoech weer Ende alle die daer diende quamen voerden coninck. ende sechden al knielende. Want du salste eten den arbeit dijnre hande. Salich bistu ende wael sal dij wesen. Doe sechde die ziele tot den engel. Myn here, ic verwondere waer om dat dese coninck so voel dienres hevet. Onder den welken ic niet ghemerken en kan die hi had doe hi levende inden lichaem was

Ende hoerstu niet hoe dese ropen en seggen Want du salste eten den arbeit dijnre hande Salich bistu ende wael sal dij wesen Die engel sechde Alle die du sieste sint cristus armen. ende pelgreme dien die coninck deilde sijne tijtlick guet. doe hij

[fol. 159d]

inden lichaem was Ende hier om loent men hem hier overmits [...] den ewigen lone sonder einde Ende die ziele sechde Ic solde geern weten Of dese mijn here enige pine geleden hevet. nae dat hi vanden lichaem was verscheiden. ende ter rusten gecomen Die engel antwoerde. Hi hevet ghepint geweest. ende noch lijdet hi alle dage. ende sal noch lijden Ende hij sechde voert Ontbeiden wij een luttel ende du salste sine pine sien. Niet lange doe sy beideden. soe wart dit huus doncker Ende alle die daer in woenden worden

[fol. 160a]

[...] bedrueft. ende die coninck [wart verstoert]. Ende al wenende stont hi op ende ghinc up Ende als dese ziele hem volgede. soe sach sy [...] dat alle die schare die sij te hemel wart. ende ynnichliken onsen heren bidden seggende Here almechtich god. als du wils ende wetes, ontferme dijns knechtes Ende die ziele sach den coninc tot den navel toe staen inden vure. Ende vanden navel voert opwarts was hij gecledet mit enen haren clede Doe sprac die

[fol. 160b]

ziel tot den engel. Hoe lange sal hij dit lijden Die engel sechden. Alle dage lijdet hij dit drie uren lanc. ende xxi uren rustet hij Die ziele sechde. Here, waer om is hi gheordelt weerdich tot desen pijnen Die engel antwoerde. Hier om lidet hi dit vuer totten navel toe. om dat hi dat sacrament der echtscap besmitte. Ende vanden navel voert opwarts soe lijdet hi die hare. Want hi beval enen greve doot te slaen beneven den heiligen pa\tricius. ende brack sijnen eyt. Want alle sijn sunden sijn hem vergeven sonder dese twe Ende hier na sechde hi: Gaen wij opwarts. Ende doe sij een alten

[fol. 160c]

hogen muere ende herde schoene