Vander derder pijnen der hoveerdiger ende der verrader
MEr doe sij van anxten mit ghemake ghijngen. soe quamen sij tot een herden diepen dael. seer stinckende ende doncker. Ende die ziel en mocht daer aff niet sien. Mer sij hoerden een geluut van eenre riviere van sweevel [ende dat roepen van den zielen die daer ghepint worden ende een stinckende roec van den swevel] die ginc opwarts. Die
[Folio 140a]
[fol. 140a]
boven allen pinen was die sij voer ghesien hadden Ende een alte langen tafel ghinc van den enen tot op den anderen barch als een brugghe. over dat dale die dusent screden lanck was ende een voets breet Ende over dese brugge en mocht nyment gaen dan die vercoren was Ende sij sach voel zielen van deser bruggen vallen. ende nyement daer over gaen ongheseericht behalven enen priester En dese was een pelgrem. ende had een slavine an. ende droech een palme in sine hant Ende voer alle die ander ghinc hi daer over onversaget Doe dese ziele sach desen
[Folio 140b]
[fol. 140b]
nauwen wech. ende sij bekande dat daer onder was die ewighe verdoeme\nisse Soe sprac sij totten engel Och mij onselige. wie sal mij verloesen vanden wege deser doot Ende die engel ansach sij mit enen bliden ansichte ende sprac. En ontsich dij niet. Want van deser saltu verloest werden. Mer na deser saltu een ander ghedoegen Ende hij ghinc voer ende hie[l]tse. ende leide sy over die brugge ongheseericht Ende doe hi se over ghebracht had Als of sij seker gheweest hadde soe sprac sij blidelic Ic bidde here of dij genoeget. soe segt mij welker zielen sijn dese pijnen die wij nu ghesien hebben
[Folio 140c]
[fol. 140c]
Die engel antwoerde hoer ende sechde. Dit vreselike diepe dal is een stede der hoverdiger. Ende die stinckende berch van zwevel is der verrader pijne Ende hij sechde tot hoer: Gaen wij. tot dat wij comen ten anderen pijnen. die ontellick meerre sijn dan die daer wij voer bij [gegaen] sijn
Auteursrecht onbekend