Tondalus' visioen en St. Patricius' vagevuur (2 delen)

Hier beghint een

[fol. 133d]

visione eens ridders van irlant Ende hoe irlant van vruchten bijnnen is

HIrlant is een eilant. int achterste vander wester zee Ende staende ende gaende. van suden nortwart. Ende is vruchtbaer van staenden wateren ende van rivieren Het hevet voel bossches Het is drechtich van vruchten Het is rick van melc ende honich. Van visschen ende jachten Ende ten heeft ghene wijngarden mer voel weits Dit lant is soe suver van serpenten. van vorssen van padden Ende van allen besten die venyn dragen. waert sake datmen holt of riemen of horne of gemul uut den lande in ander lant brachten. men solde fenyn daer mede

[fol. 134a]

verjaghen. Het is oec vruchtbaer genoech van religiosen mannen ende wijven Ende het is eerbaer ende wreet van wapenne. Ter suutsiden heeftet van veeren engelant. ende oest wert hevet die scoten. ende die birtoene de somige lude galoise heiten Ende ten noerden waert hevet die [k]atijnen ende die arkadinen Ende recht daer en tegens ten suden waerts die van spandien Dit eylant heeft xxxiiij vruchtbarige steden. Ende boven die bisscoppen van desen steden sijn twe ertsche bisscoppen. Want archmake is die meeste ende die hoeft stat in irlant noortwart. Ende [c]asalens is die hoeft stat van der suutsiden des lants Ende vander stat was

[fol. 134b]

geboren een edel man ghe[h]eiten Tondalus Ende sijne wreetheit ofte bij gods guedertierenheit in dien dat hi dede ons die mate\rie

gaf van desen wercken