Hoe die ziel wieder totten licham keren moeste
Hebdi dit al gehoert. Die seel antwoerde. Jae ic Heer. Ic bids u, laet my hijr blijven Ende dingel seide: Ghi solt tuwen lichame weder keren / ende al dat ghi ghesien hebt soldi wel onthalden ende den luden vertellen Alse die ziele hoerde datse wieder keren moest / mit groter druefheit ende weyninghen spraecse Heer wat dedic noyt quaets dat ic uut deser glorien tot mijnen lichame moet keren Ende dingel seide In dese glorie en verdienen gheyne lude te blijven dan meechden die hoeren lichame hueden van vleyscheliker begheerten Ende liever hebben te verbornen in hem selven omme alsulke glorie / dan bevlect te sijn mitter leliker ghenuechten Mer ghi en wolt niet gheloven der scryfturen / ende daeromme en moechdy hi niet blijven Daeromme gaet wieder tuwen lichame / ende huet u te doen van dat ghi te voeren daet Onse raet ende onse hulpe en sal u niet gebreken Alse dingele dit hadde gheseit / bekeerde hoer die ziele ende ghevoelde hoer selven beswaert mitter boerdenen hoers lichaems Si en sprack niet meer jeghen den engel / also saen ghevoeldese hoer selven mitten lichame op deerde Doe ontdedesi cranclic hoer oeghen Ende versuchtende ende niet sprekende [...] aenscou\wedese
Auteursrecht onbekend