Tondalus' visioen en St. Patricius' vagevuur (2 delen)

Vander mueren van preciosen steynen ende vanden .ix. choren der ingelen

Doe si ghegaen hadden sagense eyne muer in hoecheiden ende in blinckenyssen ongelijc den anderen / want si was ghemaect al van dieren gesteynten van mennigerhande verwen ende mit golde onderlect So dat scheyn dat dat golt calc was ¶ Die steyne waeren Cristallus Crisoltus Berillus Jaspis Jacinctus Smaragdus Saphirus OnichinusTopazius Sardinus Crisopassus Ametistus Turchacus ende Garnatus Van desen steynen ende deser gelijc so blicte herde zeer dese muer Doe si op die muere clummen / sagense sonder twijvel dat nye oege aen en sach / noch dat nye ore en hoerde / noch dat noet in quam in minschelike herte dat god bereyt heet den ghenen die hem minnen Want daer sagense .ix. ordenen vanden heyligen gheest Dats te verstaen Angelos Archangelos Virtutes Principatos Potentates Dominaciones Thronos Cerubin ende Seraphin Si hoerde onversegghelike woerde / die gheynen minsche georloft en sijn te spreken noch en mach spreken Doe seide dingel totter zielen: Hoert dochter en siet ende nederheldicht uwe oren ende vergete uwes volcs ende uwes vaders huys / ende die coninc sal begeeren uwe ghedante Wat

[fol. 26b]

salich segghen. Dat weit ellic wel dat grote sueticheit es, grote weerdicheit, grote spellicheit ende grote ghenoechte tanschouwen die choer der ingelen / Ende der Patriarchen / ende der Propheten lovelic getal / ende der marteleren nuwen sanck / ende taensien der glorio sen choer der Apostelen ende te verdienen der Confessoren geselscap / ende dat boven alle blijtscap gaet dats den ghenen te aenscouwen guedertieren ende guet ghemoet die alle minschen leven doet ende broet es der engelen Vandaer si doe stoenden saghense alle die glorie die si noyt ghesien en hadde[n] te voren / ende oec alle die overleden tormen[ten] / ende dat noch meere wonder was si saghen die werelt van eertrijke alse onder eyne raye vander sonnen Ende daer si aldus stoenden sonder hem te keren. sagense al dat achter hem ende voer hem was Oec en had die ziele gheyne noet meer te vraghen /

mer alrehande dinck wystse ende constse openbaerlic ende volmaectlic wat dat si wolde