Exordium magnum

Item vander onghehoersamheit

HEt sin sommighe menschen al ist sake dat sie him mit alre sorchuoldicheit alset behoerlic is afkieren van deser groeter ende in eenre manieren doetlike onghehoersamheit. nochtans soe sin se myn sorchuoldich inden mynren gheboeden der ghehoersamheit ende treden lichteliken ouer die gehoersamheit ende isset sake dat sie namaels de scholt der onghehoersamheit pinighen af te wasschen mit bichte ende penitencie dat doen sie ouerlopende ofte versumelike ende niet mit waerachtighen berouwe des herten. Desen menschen wil ic een exempel voer leggen op dat den ghenen die dat broet der loeghene dat is die begherte des eyghenen willen suete is theghen dat ghebot haers ouersten dat sie verueert werdende mit desen exempel hem seluen daer afkieren. Opdat dat ghestoelene broet niet verwandelt en weerde in die maghe der consciencien inder slanghen galle. ende dat sie wtspien die rycdoeme der onghehoersamheit. die sie ghenuechlike gheslonden hebben. ende dat se god wttrecke wt hoeren buke In den lantschap dat germania heet ouer den ryn dat ghemeenlike ghenoemet wort sassen inden lande der stad van paderborn die de grote keyser kaerle tymmerde ende hem seluen daer een pallaes in tymmerde. inden lande is een cloester van nonnen gheheten aroldisseium inder eren der hilliger apostelen iacobus ende iohannes van oldes van groeter gheestelicheit ende van strengher disciplinen. Op ene tyt regierde dit cloester een man van eersamen leuen gheheten petrus vander regulier orden. want die insettinge des cloesters ghesettet weren nae sanctus augustinus regel. Dese mensche was een stede ondersoeker ende een ynnich nauolger der gheboeden onses heren. ende claer inder godliker mynnen. ondergheworpen mytter oetmoedicheit inder kuusscheit was hie sunderlinghe merkelic. ende als een truwe kemerlinc ende een

[p. 35]

vrient des brudegomes was he eernstich mit wakender sorchuoldicheit te bewaren die kuusscheit der bruden des heren die hem beuolen weren. ende verdreef manlike die moerdenaers verderuers der kuusscheit op dat sie niet vercrachten en solden die slaepcamer des hemelschen brudegomes. Ende alse he was blenckende mit gueden seden. soe hadde he nochtans sunderlinghe alse enen kosteliken steen alse der moeder godes sunderlinge te dienen myt reynre begherten des herten. dickewile mysse te doene myt groeter ynnicheit tot hoerre eren. in allen sinen noeden sie toe verkiesen toe ene voersprekersche. ende hoer hulpe te soeken mit screieliken ende stedigen ghebeden. hie hadde ene loeuelike ghewoente ghemaket. dat alsoe dicke alse he hoerde noemen den honichuloeienden name der seluer hilliger ioncfrouwen ende moeder al wast sake dat hie ghene bequemelicheit en hadde in sinen venien te vallen. soe sprac he nochtans alse he alre ynnichlixte mochte der seluer moeder der barmherticheit die engelsche groete mit enen ghenigeden hoeuede ende mit yets wat ghebugeden knien. Doe dat arbeidelike leuen salichlike volbracht was soe quam die tyt dat hie onderuynden solde dat waerachtige hemelsche woert. Salich sin die doden die inden heren steruen. hie waert siec mitten rede. ende hoe die sieke teikene des dodes baetschapten den doet naerre te wesen hoe hie eernsteliker began te bidden die hulpe sinre sunderlingher patroenschen onser vrouwen. dicwile weder te halen hoer groete die hem ghewoenlike was. ende andachteliker te bidden dat sie hoer ghewerdigen wolde te moete te coemen totten wtganc hoers knechtekens ende oen beschermen wolde van die wreetheit der boeser gheesten. Een luttel daghen voer sinre doet riep he tot hem die priorynne vanden seluen cloester gheheten gyslam ene seer wyse o ende gheestelike ionfer ende sommighe vanden oldesten susteren ende sechde tot hem. Sie ic ingae den wech alles vleisches. ende al ysset sake dat ic nae mynre manieren hebbe ghepiniget den heren enen reynen dienst te bewysen. nochtans want die mensche niet en weet ofte hie werdich is der mynnen ofte des hates soe ontsie ic noch die scharpe sentencie des strengen richters. Ic doe v toe weten dat die hillige moeder godes die ionfer maria conyngynne des hemels. vrouwe der weerlt hoer ghewerdigen sal morghen by der sester vren toe visitieren my hoeren knechteken alsulck alse ic bin. ende alse ic hoepe gheloue ende betruwe soe sal sie my verloesen vanden ellende deser weerlt ende sal my nemen mit hoer toe die luchtige woenynge des hemelschen vaderlandes. Ende dat ic my niet en vermete enichsins moghe te verkrigen myt mynen verdiensten. dat trecke ic my betruwelike toe ouermids hoere alre hillichste verdiensten. Daer om soe doet al dat huus schoen ofte reyn maken. settet die stoelen ende verciert se ende totter seluer vren die ic voer gheseget hebbe ghebiet al die susteren hier by te wesen myt wyroeke ende myt waskeersen. Ende wanner ic beghynne dat veers van der Sequencien vander hemeluaert der saliger ioncfrouwen. Dy conyngynne des hemels dat dan alle die susteren in

[p. 36]

iubilieringhe des herten ende der stemmen die sequencie van den verse voert wt ten eynde toe singhen myt vroeliker ynnycheit. die priorynne ende al die ander susteren die daerby weren gheloueden toe hantes synen woerden. want sie wal bekanden sine hillicheit ende sine onnoeselheit. mer een conuers gheheten dirick stont totten hoeueden des beddekens daer die mensche godes op lach ende was onghelouich desen woerden. ende sprack aldusdanighe woerde in sinre herten. O hoe beweghelike ende kranck is dat wyueskunne ghelouende allen woerden. Sie dese mensche is by den dode ghecoemen ende van ghebrec der synnen soe reuekallet hie. ende dese susteren menen dat dese woerde te werke soelen coemen. rechte ofte sie voert quemen wter reden ende dat se waer weren. Doe hie aldusdanige dinghe dachte. soe richte die hillige preister sin hoeuet op mytter seluer cracht die he vermochte. ende sloech sin ogen darwerdes daer die conuers stont. ende sechde brueder dyrick bistu hier niet. hie antwoerde ya ic here. he sechde gae my naerre. doe he naerre ghinc sechde he gif my dyn hant. Die conuers verwonderde ende meynde noch dat hie onsinnych were hie en dorste nochtans niet thegen spreken. ende gaf hem sin hant Die man godes greep die hant ende druckede hardeliken mit sinen vingheren des conuersen vingheren. ende sechde alset waer is dat ic mit mynre hant dyn hant holde. ende mit mynen vingheren dyne vinghere drucke. alsoe isset waer dat ic ghesproken hebbe ouermids die crachte der godes ghenaden godes. Meer dat du sprecste in dinre herten dat salstu weten dattet valsch is alse dat ic gheck solde wesen ende niet weten en solde wat ic sechde. Ende aldus ouermids dat die onghelouige brueder berispet waert mit der godliker apenbaringe. soe waert alle twiuelachticheit van al der ander herten ghenomen. ende verbliden hem alle te gader dat alsoe groete ghenade vanden hemel ghegeuen weer horen gheesteliken vader. Die ander dach verscheen ende die vre quam die de man godes voergesecht hadde. ende al die susteren mit den leken brueders quemen te gader verwachtende soe vele te sekerre die toecomste der alre goddienstichster conyngynnen des hemels. hoe die ghene die dat te voeren ghesecht hadde vast hadde ghemaket mit enen apenbaren myrakel. Inder voerghenoemder vren soe waert daer also grote eerwerdicheit inghestortet in die herten alle der gheenre die daer by weren. dat niemant van hem en mochte twiuelen daer en weer ghecoemen een godlike cracht. Die salige preister in eenre wonderliker manieren myt enen vroeliken aensichte. mit opgheslagen oghen ten hemel myt opgherecten handen anhoef he singhende dat veers dat hie te voeren ghesecht hadde. Dy conyngynne des hemels viert toe gader dit volckesken mit goddienstigen herten. Meer wie solde dat weerdelike wt moghen spreken mit hoe groeter ynnicheit ende beweghelicheit. mit hoe groeter begherten der goddiensticheit die selue Sequencie vanden susteren wtghesongen is. Doe man dese sequencie sanck lach die knecht

[p. 37]

godes in synen verscheiden. ende opgherucket buten hem seluen ende heuet bekent ouermids apenbaeringe vele dinge van hemelschen hemeliken dinghen ende vanden state des seluen cloesters. de he namaels te weten dede der priorynnen ende den oldesten susteren. hoerre alre ogen staerden op hem ende seghen dat sin aensichte haestelike verduustert waert. ende sin voerhoeuet rympich ende gaf tekenen van droefheit ende van groeter begancheit ende brekende wt mitter stemmen sprac he mit yamerliker screiinge aldus danige woerde. waer omme O alre goddienstichste ende barmhertichste vrouwe latestu achter dyn arme knechtekyn in deser heffen der sterflicheit. den du al was ickes onwerdich dy ghewerdighet hebbest mit dinre guedertierenre vandinghe te troesten. Dine suete theghenwoerdicheit die mit soe groeten begherten is beghert. ende mit vele ghebedes ende tranen is ghebeden hebstu ghewerdelike verleent den ghenen die nu steruen sal. ende weygherstu nu den onsalighen din gheselschap totten vaderlande des leuens. Doe hie dicwile riep alre goddienstichste vrouwe alre barmhertichste vrouwe en laet my niet achter. soe beweghede hie al die ghene die daer by weren tot screien. hie quam weder tot hem seluen. ende doe hie een luttel gherustet hadde nader groeter vermoeyenysse. soe liet hie die andere gaen ende hielt by hem die priorynne ende luttele olde susteren ende sechde aldus tot hem haelt my een luttel uates daer ic mynen droeghen mont mede lauen moeghe. op dat ic gheredelike wt spreken moeghe dat ic segghen sal. Die priorynne haelde seluer een vatekyn mit een luttel wyns. te hantes doe sie ghecoemen was totten dorpel des huuses daer die mensche godes in lach. ende hie noch mit sien noch mit ruken noch mit ghenen synnen des lichaemes vernemen en konde wat sie droech riep hie segghende. vrouwe pryorynne en brenget ons ghenen wyn. want die wyn ontdecket die verborgene dinghe. ende die wyn doet die wysen afuallen van enen gueden staet. Doe sie hoerde dat sie mit soe apenbaren gheeste der prophecien begrepen was beuede sie alsoe sere dat sie hoeren ganc nauwe weder omme kiesen en mochte. Daer nae doe hie mit een luttel waters ghelauet was. heuet hie aldus begonnen toe spreken. Och of ic onsalige mensche subtiliker hadde verstaen eer dat icket onderuonden hadde hoe groet dat die pine ende scholt der onghehoersamheit is. op dat ic dat uwen herten alset noet is moeghe inprenten. Siet om die scholt der onghehoersamheit heuet myn alre goddienstichste vrouwe my nu hier ghelaten in desen dale der tranen. noch sie en heuet my niet werdich gherekent dat ic onder hoer beschermenisse voer bygaende die moghentheiden der locht die duuelen. doer solde gaen die hemelicheit des hemels. Meer hoe danich dat myne onghehoersamheit gheweest heuet dat hoert. het gheuiel op ene tyt dat vele preisters deses stichtes bedrogen mit onuersienliken rekeningen die vasten vander quatertemper inden herueste in onrechter tyt hielden mit hoeren kerspels volke. daer ic oec schuldich ynne was. Inden eersten capittel dat die preisters daer nae hielden. waert dese ouertredinge beschuldiget. ende daer waert ghebod en by ghehoersamheit dat soe wie hier ynne hem schuldich kande dat he verghifnisse

[p. 38]

bidden solde ende hem seluen schuldich gheuen. Doe die andere die hem schuldich kanden oetmoedelike deden datter gheboden was. mer verkiesende ghebrec toe liden in hoeren gheruchte dan in hoerre consciencien. ic onsalige mensche schaemde my apenbaerlike verghifnisse te bidden bewisende mer eren der orden ende mynen gheruchte dan der waerheit. Want ic een vanden prelaten der kerken was. ende scheen oec wat van gheesteliken leuen toe wesen. leider soe en konde ic niet liden die versmadenisse der confusien. Dit is myne sunde dit is die sunde der onghehoersamheit. waer om ic huden ten daghe beroeuet werde van alsoe groeten guede dat ic verstoeten van den naeuolghen onser alre vrouwen der moeder der barmherticheit weder gheroepen bin vanden inganc des ewighen leuens ende der ewigher glorien totter armoede deser sterflicheit, Die pryorynne vraghede ofte hie die vlecken vandier sunde niet afghewasschen en hadde ouermids bichte ende penitencie. hie antwoerde dat hie die sunde niet eens meer dicwile ghebichtet hadde. die pryorynne sechde mit groeten verwonderen. wee my sundersche heer vader wat sullen wy dan segghen vanden sacramente der bichten. Isset sake dat dy verghifnisse gheweigert is die niet eens mer dicwile ghebichtet hebste. we mach dan hoepen vergifnisse der sunden ouermids der bichten te verkrigen. hie antwoerde een woert dat werdich is datment ontholde inder ghehuechnisse segghende. Ghy sult weten dat nader menynge ofte berouwe des gheens die daer bichtet ofte penitencie doet soe wert die verghifnisse van gode ghegeuen. want ic onsalige mensche versumede myne sunde te weghen nae waerachtiger weerde. ende ic sie niet ghebichtet en hebbe myt alsoe groeten berouwe ende beweghelicheit des herten alset noet hadde gheweest. daer om en heb ic tot deser tyt toe niet verdient verghifnisse toe verkrigen. Doe hie dusdanighe woerde droeuende sprack soe worden die herten der susteren die theghenwoerdich weren gheslagen mit groeten anxte ende niet luttel en worden sie ontsteken te volghen die puerheit der ghehoersamheit. heb icket wal ontholden soe leuede he drie daghe daer nae. alsoe vele te bitterliker bescreiende sine sunde hoe dat hie apenbaerliker onderuonden hadde die strengicheit des godliken ordels. Al steruende voersechde hie dat in dat selue cloester ene groete sterfte coemen solde. welke sterfte te hantes volghede nae sinen dode. Ende aldus heuet hie in vreden sine daghe volbracht. ende vol van gueden werken is hie gheleget tot sinen vaders. Meer nochtans die hoechtidelike ende gloriose ontfanginghe dat hie solde hebben ontfanghen gheweest mitter hilliger moeder godes marien ende mit veelheit der engelen hadde hie ghene scholt ghehadt die heuet hie verloren mytter onghehoersamheit. Och ofte wy alle gader die ghehoersamheit ghelouet hebben verueert worden mit sinen exempel dat wy nummermeer en vielen in die onghehoersamheit. ofte weert sake dat wy daer in vielen ouermids menschelike krancheit dat wy dat haesteden af te wasschen mit screyinge der penitencien

[p. 39]