Van enen monick die sonder kolsen tgeghen die reghel sliepp
WAnt wy mitten voergaenden exempel bekent hebben hoe strenghelike dat die ouertredinge ghepinicht is die ghedaen was mit voerrade mer niet als ic vermoede ouermiddes versmadenisse. soe wil ic noch vertellen een ander exempel sins ghelike dat gheschiet is niet toe clarendael. mer in een ander cloester der orden van cistercien. op dat wi hier mede bewisen moeghen dat die ouertredinge der mynneste gheboede niet licht van gode gherekent en werden. ende op dat onse traecheit mit desen exempelen ghewecket werden sorchuoldeliken te waken op hoer seluen. Een cloester der orden van cistercien en hadde ghenen abbet. Die vader abbet waert gheropen opdat in sinre thegenwoerdicheit ende by sinen rade die broders vanden cloester mochten kiesen nae insettinge der orden enen bequemen persoenen tot enen vader ende hierde horre sielen. Doe die tyt des kiesens anstaende was ende die vader abbet beide wt hemeliken ende apenbaren verkallingen gheleert hadde eens yegeliken brueders begherte ende wille. soe bekande hie dat die wyseste ende reckelicste brueders mit enen eendrachtigen konsente vielen op enen persoen die doe by auentueren van huus was mer men hoepte dat hie te hantes coemen solde. Ende die selue persoen was die ouerste kelner vanden cloester. Des nachtes die voerby ghinc den dach doe men kiesen solde hoerde die vader abbet ouermids die godlike apenbaeringe ene stemme de tot hem sechde. Sie daer toe dattu den monyck gheen abbet en makeste die ghelegen heuet sonder kolsen. Tot deser stemmen soe waert die eersame abbet seer versaghet. ende dachte ouer mit groeter verwonderinge wat die here hier mede toe weten wolde doen. Die voerghenoemde persoen die men hoepte bequem toe wesen toe die werdicheit alsoe groten amptes was des auendes late te huus ghecomen doe men des naesten daghes kiesen solde. des morghens ael vroe toech hie den vader abbet mit enen teiken in dat capittel huus ende bichtede oetmoedelike dat hie
Auteursrecht onbekend