Exordium magnum

van enen conuers die ghepynt waert van gode want he syne kolsen wesch sonder oerlof

WAnt wy om stichticheit wille der ghenre die voertgaen in doechden vele ghesproken hebben. vanden seden ende gheesteliken leuen ofte oec vanden costeliken dode der hilliger vaders. nu wille wy om waernynge wille der tragher menschen mede vertellen die versumenisse eens brueders ende die pine die hie leet van gode om der seluer versumenisse wille. op dat alse die ghene die voertgaen willen verwecket werden mit exempelen tot meerre beteringen. dat alsoe die versumende menschen verueert werden mitter wrake der godliker strengicheit ende oec op dat

[p. 26]

sie hem ontsien solden te ouertreden die mynre insettinghe der godliker orden. Een conuers was in enen van den wthoeuen des cloesters van clarendael die sonder oerlof des meisters des wthoeues sin kolsen wessche. hie was alleen wtghegaen ende stont op dat ryuier datter loepet biden wthoeue al wasschende. Och hie onsalige en merkede niet dat sie swaerlike sundighen inden ogen des heren. die oec inden mynnensten dingen breken die puerheit der hilliger orden. Doe hie dan arbeidende was in dat voerghenoemde werc daer hie gheen oerlof to en hadde hoerde hie ene stemme ropende ofte yemant den ander en toe ghesproken hadde ende gheseget hadde slae slae. sonder marren soe voelde die selue conuers dat he mit tween swaren slagen gheslaghen waert die ene in sin hoeuet ende die ander in sin voeten. beuende ende bleec werdende ghinc hie haestelike in weder in dat wthof. hie toende den brueders mit beuenden lippen wat hie ghedaen hadde ofte wat hie ghehort hadde. ende oec wat he leet. Die broeders sandene toe hantes toe clarendael int cloester. hie beliede sine sunde ende oec die pine die he leet voer die sunde mit alsoe groeter oetmoedicheit als he mochte. Ende hie sechde dat die slaghen die hie onsienlike ontfangen hadde croepen tot sine binnenste. die ene vanden hoeuede nederwert ende die ander vanden voeten opwerder ende dat hie vmmer steruen moste wanner dat die slaghen te gader quemen in sin herte. Dat dat eynde oec proeuede waer te wesen. want die selue nae luttel dagen sin leuen eyndede in gueder beliinghe. soe vele reynre alse wy guedertierlic ghelouen gaende toe gode. hoe he mit verueerliker dode ghepinicht waert voer sin scholt. meer wat mene wy die sake te wesen dat de rechtuerdighe richter die heer der heren die die omganc der eerden ordelt in ghelicheit voer ghelike scholt onghelike sentencie schint toe gheuen. nochtans dattet seker is dat die wysheit godes die niet allene sueteliken mer oec voersienlike alle dinge satet. niet en mach willen bedrieghen noch oec bedroghen en mach werden. Och hoe vele isser huden te daghe die cappen draghen ende moniken heten. die versaket hebben die eyghenheit na hoerre regel ende orde. die nochtans naden exempel ananie ende saphire hem niet en ontsien mit ghecker vermetelheit te hebben eyghen guet. al wast sake dat die cracht die daer ginc wt den monde Sanctus peters des apostels ananiam ende saphiram pinichde mit enen verueerliken dode. nochtans soe en werden dese moniken mit ghenre plaghen gheslaghen. mer die schinen in gueden dingen hoer daghe ouer te brengen. Och of sie niet in enen ogen blic neder en clommen ter hellen. Ende al ist sake dat die orde van cistercien ouermids der ghenaden godes puer ende gans sy van soe groeuen ghebrec der eygenheit. nochtans hebben daer sommighe gheweest of sinter noch sommige van dier tyt dat de brueder om soe lichte scholt alset scheen ontfenc die sentencie van soe harden dode. die sonder ansien der hilliger orden wanner sie lichtelike ouertreden in lichten ghebreken pleghen sie te wisen ofte mitten woerde toe seggen. Wat is dit ofte hoe groet is dit. ende en merken niet datter ghescreuen is. die die mynneste dinge versmaden

[p. 27]

die valt allentelen. Die nochtans die almechtige god niet te hantes en piniget. niet wanttet nu in deser tyt al soe swaer sunde niet en sy sonder oerlof yet te wasschen ofte yet anders te doene sonder volboert des ouersten alset op die tyt was doe god tot enen exempel der ghenre die namaels coemen solden strengelike slaen wolde alsulke onghehoersamheiden. mer want hie guedertieren ende barmhertich is soe heuet hie hem ghewerdiget ons te verwecken mit sin alre guedertierenste lydsamheit tot die medicine des beliens ende penitencien. Ende ofter somyge sin dat god verbieden moet die menen dat sie dese lichte dingen doen mogen sonder swaer perikel hoerre sielen. ende versumen alsulke ouertredinge ofte wasschen mit werdige vruchte des bichtens ende der penitencien. mer soe se dese dinge allentelen myn achtende werden. soe sal die dorrick der versumenisse hoghe op wassen. ende dat schip hoerre consciencien sal sonder twiuel god en coeme hem te hulpe versincken inden gronde