Een cort onderricht.
So yemant desen spieghel des Hoochmoets begeert den volcke Speelwijs voor te stellen, so salmen het Raduys, Taneel oft Speelwaghen maken op dese manier, op de een zijde heel int uyterste salmen maken een ghedaente van een verbrande stadt, eenen hoop steenen noch roockende ende brandende, daer men vlassenwerck oft yet anders sal leggen, ende dat altemet roeren so sal den brant vernieuwen: inden uytersten hoeck moet staen een toorn daer Vlisses het kint Astianax af sal werpen: ende beneden inde verbrande stadt by den toorn moet staen van buyten een groote kiste in gedaente van een graf, welck sal zijn het graf van Hector daer Andromache 'tvoorseyde kint in sal berghen, ende by Vlissem sal ghevonden worden: naest de stadt sullen uyt ende ingaen al de Troyaensche vrouwen, ende den ouden man: daer naer int midden sal staen een camer die met gordijnen sal open ende toe gaen: hier sal int midden staen een graf, welck sal wesen het graf van Achilles daer Polixena voor sal legghen van Pyrrus door ghesteken, ende sal ten lesten gheleyt worden in Achilles graf, Pyrrus sal Zijn swaert af vaghen al oft bebloet ware: daer naest sal staen den uyt ende inganck van alle de Griecken: ende opt lest sal staen het huys van Calchos, daer den Poeet oft Dichtstelder oock sal uyt ende in gaen: alle dese Troyaensche vrouwen moeten gecleet zijn inden rou als bedroeft Zijnde, alleen Helena moet costelijck ende uytwendich, doch op de oude maniere ghecleet zijn: Polixena als een statighe jouffrou jonghe dochter, Zijnde eens Conincx dochter: Astianax moet ghecleet zijn als een Princen kint: ende men moet noch een kint maken gevult, ende alleleens gecleet als 'tvoorseyde kint, dit ghevult kint salmen op de toorn legghen, ende als Vlisses het levende kint wilt van boven neer werpen, dan salt hem laten ter aerden vallen, dan sal hy dat ander ghevult kint van boven neer werpen als oft het levende waer: Agamemnon moet ghecleet zijn als eenen Griecschen Coninc: Vlisses, Pyrrus als groote Heeren, doch op de oude maniere, dan Vlisses moet drye oft vier knechten by hem hebben gewapent als hy het kint soect: Calchos moet lanck ghecleet zijn als een Philosooph: den ouden man als een oudt Borgher: meest moet hier gelet worden dat het doot steken van Polixena, ende het af werpen van Astianax aerdich geschiet, want by de Griecxsche oft Latijnsche en wort dit int openbaer niet voorghestelt, dan alleen verhaelt so gheschiet te wesen.
Auteursrechtvrij