Een cort onderricht.
So yemant desen spieghel der Reynicheyt begheert den volcke Speelwijs voor te stellen, salmen het Raduys, Taneel, oft Speelwaghen maken in dusdanige manieren, te weten, het huys oft hof van Aristoclides teenemael opt uyterste, daer hy ende Onmatighen lust met Boosen wil, sullen uyt ende in gaen, int midden vant Taneel sal staen het huys van Stymphalis, daer sy met haer dienstmaecht sullen uyt ende in gaen, daer moet gemaect zijn een camer, daer sy ende haer jonckwijf in sitten en nayen, ende op d'ander Zijde int uyterste sal staen den Tempel of Kercke van Diana, daer eenen outaer met een beelt op sal staen: Celestina met ander knechten met geweer, sullen uyt ende in gaen in des Conincx hof: de gemeynte sal hier ende daer uyt comen, niet veir van de Kercke: Aristoclides moet ghecleet zijn seer costelijck als eenen jonghen Coninck, hebbende by hem eenen Pagie oft twee: Onmatigen lust ende Boosen wil moeten ghecleet Zijn als lichte Edel-lieden dienaers vanden Coninck: Stymphalis moet cierlijck ghecleet zijn als een jonge maecht ende Vffrou met een dienstmaecht: Celestina moet ghecleet zijn als een oude coppelersse: men moet wel acht op alles nemen als Stymphalis Aristoclides ontloopt, dat sy eens binnen loopt, ende op de ander zijde weder uyt, ende so naer de Kercke, op dat den loop wat mach dueren, ende men moet gade slaen dat het dootsteken, ende alle ander dinghen, wel te werck gaen.
Auteursrechtvrij