Spiegelboeck
(1600)–Jacob Duym–
AuteursrechtvrijSaleucus den ouden. Eersten Raet. Tvveeden Raet.
| |
[Folio O1v]
| |
De schaemte is nu vvech, de maechden vvorden stout,
D'eerbaerheyt heel verflout, tis voor ons groote schant,
Oncuysheyt, overspel, moetvvil heeft d'overhant,
Daer en vvorden nu schier, gants geen vrouvven verschoont,
mans en vrouvven elck hem, even lichtveerdich toont,
Locria vergaet, oft, vvy moeten raet schaffen,
Ia God sou ons te recht, allegader straffen,
Dat vvy daer teghen niet, ernstlijck en versaghen,
VVy zijn hier inden Raet, connen vvy sorch draghen?
Hoe dat t'huys gaet met al, ons dochters en vrouvven?
Dit vvil ick elck van u, o broeders vvaerschouvven,
Daer dient raet toe ghesocht, om sulcx heel te vveiren.
Eersten Raet.
Ons Borghemeester spreect, 'tgheen vvy oock begheiren,
Voor ons allen spreect hy, en voor des stadts besten,
VVant vrouvven-schenden claer, in dese ghevvesten,
VVort hier nu schier ghebruyct, in plaets van de deuchden,
Ia de ghehoude mans, maken groote vreuchden,
Als sy malcanders vvijfs, bringhen int verseeren,
Sy en sparen oock niet, de dochters met eeren,
Sy volghen anders niet, dan den oncuysschen vvil,
Doen zijt niet openbaer, so doen zijt dan int stil,
Dus moeter goe straf zijn, oft vvy gaen verloren,
Heer Borghemeester segt, ghy ons eerst al voren,
Vvve meyning, en van, de straffe uvven sin.
Saleucus.
Dat ghy sulcx ghesint zijt, dunct my een groot ghevvin,
So soud' ick dan dees straf, goet en noodich achten,
VVie daer bevonden vvort, tsy van vvat gheslachten,
VVoonende hier in stadt, oft onder ons ghebiet,
Die overspel bedrijft, het sy hoe sulcx gheschiet,
Tsy oft een ghehout man, met een hoer boeleerde,
Oft onghehout met een, anders vrou hoereerde,
Door sulcx bedrijf sal hy, stracx vvorden ghecastijt,
| |
[Folio O2r]
| |
Sonder ghenaed', oft oock, sonder eenich respijt,
Men sal hem maken quijt, van beyde zijn ooghen,
So daer yemant voor bidt, men salt niet ghedooghen,
Men salse beyd' in elcx, aenschouvven uyt steken,
Dit is den middel jaet, teghen het echtbreken,
Die my dunct dat daer vvel, hoorden te zijn ghebruyct.
Eersten Raet.
Van vreuchden mijn hert my, invvendich schier ontluyct,
Als ick Saleuce Heer, hoor u goede meyning,
D'eerbaerheyt moet by ons, in gheender vercleyning
Zijn, maer het misbruyck moet, ghestraft zijn grootelijck,
Al schijnt de straf heel groot, sy is vvel nootelijck,
VVant men canse claer niet, te svvaer oft groot setten.
Tweeden Raet.
Thert my oock seer verheucht, door alsulcke vvetten,
Hoe vvel dat 'tverlies van, beyd' d'ooghen schijnt heel svvaer,
Maer is de straf niet groot, sy latent niet dats claer,
En so my dunct, de straf, mach niet te groot vvesen.
Derden Raet.
Ons Borghemeesters VVet, vvort van my ghepresen,
Sy is seer goet, vvort slechts, sulcx so heel vast ghestelt,
Dat het ghehouden vvort, en niet met eenich ghelt,
Oft door voorbidden oock, en vvord' naer ghelaten.
Vierden Raet.
Daerom moet het ghebot, bondich uyter maten,
En vvel sterck ghemaect zijn, en ghevolcht metter spoet,
En ick vind' sulck ghebot, seer redelijck en goet,
VVordet te vverck ghestelt, vvy crijghen eer en,, prijs.
Vijfden Raet.
VVy lieden volghen oock, u begheert goet en,, wijs,
VVie sou beletten doch, een alsulck loflijck vverck,
VVordet slechts ghemaect vvel, volcomen vast en sterck,
Is dit niet uvven sin, ghy Heeren al te samen.
Volghende Raden.
| |
[Folio O2v]
| |
Iaet.
Saleucus.
VVel dan ghy Griffier, doet naer den betamen,
Ons meyninghe hebt ghy, nu ter deghen verstaen,
Volcht dan sulcx vvel in als, 'tmoet so vvorden ghedaen,
Maket sterck ghenoech, vvilt, daer niet in vergheten,
VVy gaen tervvijl af doen, dat vvy noodich vveten.
De gordijnen van de Raets camer gaen toe.
|
|