|
| |
| |
| |
Vande vijfde Gheschiedenis, de derde uytcomst.
Eerste der Borghermeesteren, Graeff Mauritz, Tvveede der Borghermeesteren.
Met groote eerbiedinge comen de Borghermeesters bij sijn Excellencie.
Eerste der Borghermeesteren.
O Doorluchtichsten Prins, o goedertieren Vorst,
vvy vveten dat u naer gheen goet, oft bloed en dorst,
T'vvelck ons te stouter doet hier comen voor u ooghen,
vvy bidden siet ons aen, door een recht med-ghedooghen,
Ontfangt ons Borghers doch al t'samen in ghenaed',
u Onderdanen ziin sy doch al vroech en spaed',
Tis u Voorvaders Stad, uyt haren stam ghesproten,
vvy hebben soo veel deughts van't Nassaussch' huys genoten,
vveest doch noch dees reys tot ons met u jonst ghereed,
Al is den vyand by ons ghevveest tis ons leed,
En teghen onsen danck, is sulcx gheschiet vvarachtich:
vvat verdriet dat sulcx ons vvas is elck vvel indachtich,
vvilt sulcx doch vvel insien als Vader goedertier.
Ghy Heeren denckt claer niet dat sulcx is miin manier,
Dat ick als vyand soud' tot u nu ziin ghecomen,
Maer tot beschudding', en troost van d'oprechte vromen,
En al dat ick doe en is voor miin eyghen niet,
Der Heeren Staten vverck ist al dat hier gheschiet:
Tis s'Lands ghemeynen Raed die my nu te vverck stellen,
Sy senden my niet om u eenichsins te quellen,
Maer om te brenghen u met haer in een verbond,
'Tis u gheluck dat ick den vyand u niet en vond,
| |
| |
Had hy in stad ghevveest, ick had hem moeten soecken,
de Stad vvaer licht gheschend oft gherooft in veel hoecken,
des danckt God boven al, diet nu soo heeft gheschickt,
Hy maeckt den vyand soo verbaest, en soo verschrickt,
dat hy al sonder slach oft stoot met schand ghevlucht,, is:
vvat ist dat ghy noch sorght, oft vvaer voor t'hert beducht,, is?
Ick segh u Genaed' toe, maeckt vreught als nu ter tijd,
Met een cleyn somma ghelts vvord ghy gheheel bevrijd,
Van allen overlast, en moetvvil der Soldaten,
Een tonne schats geeft aen de Vereenichde Staten,
ddenkt dat veel heeft ghecost nu desen grooten tocht,
denckt dat ghy met cleyn ghelt tot vrijheyt zijt ghebrocht,
Ghetoghen zijt ghy uyt het jock der slavernijen.
Tweede der Borghermeesteren.
u Excellenc'es vvoord doet ons gheheel verblijen,
En vvy bedancken haer, van de bevvesen deught,
u aen gheboden g'naed bringt ons een groote vreught:
Maer t'hert vvord ons bezvvaert als yemand spreekt van gheven,
den middel is te cleyn, die ons is over bleven:
vvy ziin onlangs berooft, een deel der stad verbrand,
Gheschat, gheschoren oock, vvy en heel het plat Land:
Te schaed'lijck is ghevveest de groote uyt teeringhe,
Iae dan gheseten oock heel ghebloot van neeringhe,
Hoe soud' ons mogh'lijck ziin nu ziind' in desen staet,
Te gheven eenich ghelt, vvy vvetens gheenen raet:
de Heeren Staten goet, die moeten ons verschoonen.
Al vvat ghy daer seght ben ick bereed te vertoonen,
En u vvoord oock te doen, al naer u eyghen segghen,
Maer dit is nu de saeck, die ghy moet over legghen,
De Crijchslie in dees tocht gheleden hebben nood,
| |
[Folio Giijr]
[fol. Giijr]
| |
En t'lijf voor u ghevvaeght, en niet ontsien haer dood,
Tis meer dan reden claer dat sy vveer vvat ghenieten:
Een Crijchs-man lijd seer veel, en laet hem niet verdrieten,
Op hoop van vvat buyts, oft van eenen goeden loon,
Ghevvonnen is u Stad, de knechten hebbent schoon,
Dus spreeckt in tijds, t'vvaer my leed soud ghyt nae beclaghen,
Het Crijchs-volck comt vvat toe die den hals moeten vvagen
Maer mids den middel cleyn, soo ghy hier selfs verhaelt,
Te vreden sullen sy ziin als ghy haer betaelt
Tvvee maenden Solds in gheld, stelt haer daer met te vreden,
Dan sult ghy voorts naer recht en alle oude zeden,
Stil leven gherust, jae behouden al u goet.
Eerste der Borghermeesteren.
Hoe seer dat ons sulcx smert en schier raeckt s'herten bloet,
Soo sullen vvy noch sien (ist doenliick) op te bringhen,
VVy dancken u Genaed' dat ghy soo sonderlinghen
Tot ons gheneghen ziit, u Princelicke jonst
Is ons seer aenghenaem, vvy segghen vrii ten ronst
Dat t'volck oock tuvvaerts is, met liefd' en trou gheneghen,
En vvy bedancken u, van al ons Borghers vveghen:
u Dienaers blijven sy nu en haer leven lanck.
Geeft God doch boven al den loff, prijs, eer en danck,
De Heeren Staten oock, die den cost ghedaen hebben,
Daer naer dees hoplie cloeck, die u by ghestaen hebben,
En vveest voorts al goets moets, en leeft voort aen met lust,
Gaet en vercondicht dit, op dat het volck gherust
Vrijmoedich leven mach, en Godes eer verbreyden.
Tweede der Borghermeesteren.
de heer vvilt u o Prins, voort aen al om gheleyden.
Om uvven vyand snel te bringhen int ghevveen,
| |
[Folio Giijv]
[fol. Giijv]
| |
Der vromen leyds-man is hy, en den troost alleen.
Nu is hier anders niet te doen dan God te loven,
vvant d'overvvinning' comt doch al van hem daer boven:
Hem sy loff, eer, en prijs, die t'hert soo heeft ghesterckt
Van de Crijchslie, die soo cloeckmoedich in haer vverck,
den vyand nu ter tijd fray hebben over vvonnen:
Het is seer stout volbroght, dat loflijck vvas begonnen,
Den vyand maeckten de Heer verschrickt en verbaest,
Met schand vertrocken sy uyt stad, met grooter haest,
Maer haren danck sal claer van Parma niet seer groot ziin,
Ick sorgh dat haren loon voorvvaer vvel mocht de doot ziin.
Nu Hopman Herrogeir u segh ick naer veel eer,
Ick beveel u t'Casteel, en de Stad, en noch meer
Sult ghy oock over t'heel Land van Breda ghebieden,
De Borghers beveel ick u, en al de goed' lieden,
Die daer in vvoonen nu, dat ghy haer vvel bevvaert,
Ghy vvord eer yet lang (hoop ick) Gouverneur verclaert,
De Heeren Staten ziin't die u de eer bevvijsen:
Capiteyn Lambert u moet ick nu oock hoogh prijsen,
Ghy sult Sergeant Major ziin van't volck en de stad,
En d'ander Crijchslie al, ghy crijghes al te bad,
Door d'eer die u toe comt sal elck u seer hoogh achten:
Verbetering' sult ghy van staet en loon vervvachten,
T'vvord u vergolden vvel voor uvven trouvven dinst:
Betrout my sulcx vrij toe, vvie ghy ziit meest oft minst,
Ick svveer dat ick sal by de Staten heel v vvoord doen,
vvilt daer en tusschen oock dienst met trou en accort doen.
En gaen vvy alle dinck ter deegh beschicken dan,
Sien vvie hier blijven sal oft daer vveer trecken van,
Bevelen God de rest, die de saeck sal stieren,, vvel,
Dat vvy in sijnen naem doen sal claer noch tieren,, vvel.
| |
| |
Besluyt-reden by den Dicht-stelder.
HEt onderscheyt kond ghy nu mercken dat daer is
Soo tusschen Troyaensch' paert, en torf-schip vvaer bevonden,
Sy hadden beyd' den buyck vol mans ghevvapent fris:
Sy trocken haer beyd' in, de Treckers ziin verslonden,
Al haren ballast vvas gheladen met drucx vvonden,
Maer Troyen raeckten heel in nood, te grond' verbrand,
Breda dat vvord verlost, ghevrijd tot dier stonden,
En Troyen viel haest in der vvreeden Griecken hand:
Maer Breda dat criight van sijn vrienden onderstand,
Haer Bond-genoten zijn't die tot haer zijn ghecomen:
Tis den Nassauschen Held, uyt den naem van t'heel Land,
Die haer soo goedertier in ghenaed' heeft ghenomen,
Verblijd u dan Breda, verheught u al ghy vromen:
Eert, prijst, looft uvven God, vveet hem danck boven al,
vvant u vyanden ziit ghy quijt, leeft sonder schromen,
Denckt vrij dat ghy ziit van't vercoren Gods ghetal,
En dat hy sijnen Naem door u groot maken sal,
VVilt dan dees cloecke daed altijd ghebenedijen,
Gheluckigh zijt ghy claer hier in dit aerdsche dal,
Om dat men u nu siet van't Spaensch jock heel bevrijen,
De deught aen u betoont vvilt doch rond uyt belijen,
Al uvven druck moet nu in blijdschap soet verkeert,, zijn,
Die u doen onderstand die moeten hoogh ghe-eert,, zijn.
Eynde des vijfde Boecx.
|
|
Auteursrechtvrij