Ghedenck-boeck

Besluyt-reden by den Dichtstelder.

DIt is den Spieghel nu van al ander Steden,
vvat helpt Antvverpens macht, dat sy schoon is en rijck,
Niet langher als God vvil, kond sy gheziin in vreden,
Veel neeringh' is sy quijt, uyt haer vvijckt yeghelijck,
haer ghelt, haer goet is claer te achten als vuyl slijck:
het vvelck maer tijdlijck is, het eeuvvich moet sy derven.
De Vreemdelinck nam meest naer holland sijnen vvijck,
Vyanden in de plaets van vrienden moest sy erven:
In plaets van vveelde groot, moest sy s'Spaensch jock vervverven:

[fol. Givr]

 

Antvverpen tis met u heel qualijck nu ghestelt,

 

vvel menich vvenschten daer om een godsalich sterven,

 

In plaets van vrijheyd soet, lijd ghy cracht en ghevvelt.

 

vvat helpt u sterckte nu, vvat helpt nu al u ghelt:

 

Och spieghelt u nu ghy stercke Steden machtich,

 

In plaets van t'Godliick vvoord, vvort sy nu ghequelt

 

Met menschen droomen quaet, en vvoorden onvvarachtich,

 

Elck een vvie dat het zy, vveest t'boos bedrijf ghedachtich,

 

En seght rond uyt met my: tis onser sonden schult,

 

Denckt Godes hand is noch als doen, al even crachtich:

 

Laet ons God bidden, troost vervvachten met ghedult,

 

Hy kan ons helpen vveer als de straff is vervult,

 

Laet ons troost soecken dan by den Hemelschen Vader.

 

Die ons een salich eynd vvil gheven alle gader.

Eynde des vierden Boecx.