Den Dichtstelder, beduydende t'voorgaende.
HIer zijn u nu int eerst voor ooghen claer ghestelt,
Een deel snoo boeven stout, die t'land en al de lieden
Bederven inden grond, en nement met ghevvelt:
Sucx hebben vvy ghesien van't Spaens gespuys geschieden:
Sy vvisten des Lands schat en riickdom te bespieden:
En creghen dien, tsy met ghevveld, oft met list,
Al vvie haer teghen stond, moest sterven oft vvegh vlieden,
Op's Lands gherechticheyt en vvord niet eens ghegist.
Iae al haer misdaet vvas te vooren uyt ghevvist,
Al eer sy hier in dit Land vvaren oyt ghecomen,
Als honden vvaren sy op d'Invvoonders ghehist,
De Previlegen s'Lands die vvaren heel benomen,
Elck mocht doen vvel te recht voor haer bedrijf seer schromen,
VVant doch geen stuck hoe boos, sy dorstent vvel bestaen,
Ia niemand vvasser vry, noch boose noch gheen vromen,
Todos lvteranos, vvas 'tdaghelicx vermaen,
Daer vvas niet in te doen, men liet haer al begaen:
De Maeght vvas aende rotz, dats Tyranni, ghebonden,
Maer Perseus diet vvist, heeft sulcx vvel leed ghedaen:
Dats den Nassouschen Prins, Verlosser s'Lands bevonden.
Hy vvist dat de Maeght vvas beladen met drucx vvonden:
Des hy haer sijn hulp bood, en trooste soo hy mocht,
Hy cond niet liiden, dat sy vvorden sou verslonden,
Van dat Alfachtich beest, dvvelck daer te volghen docht,
Den last, en vvreeden aert, die hy uyt Spaengnen brocht:
Des vvas de Maeght nu vvat den svvaren druck stakende,
Mits hoop te vvorden haest van Perseo besocht,
En dat haer vrijheyt soud eer yet lang sijn nakende.
|
|
Auteursrechtvrij