Logo DBNL
Refreinenbundel (1940)

Refreinenbundel

(1940)–Jan van Doesborch–rechtenstatus Auteursrecht onbekend

Vorige Volgende

[XXII] Refreyn

 
MEt belemmerde sinnen moet ic ontstelt zijn, vs. 1
 
met ooghen die met tranen nat sijn,
 
met suchten der herten moet ic gequelt zijn
 
als die arme allendighe die in Venus pat zijn,
5
onhope van trooste moet mijn stadt sijn,
 
desperacie mijn vruecht mi in te verbliden,
 
dus roepic als die van liden mat sijn:
 
druck sonder troost is quaet om lijden.
 
Ghi die mijn vruecht, mijn iuiblacie is,
10
ghi daer mijn iuecht, minen sin op staen moet,
 
ghi die mijn troost, mijn confortacie is,
 
daer mi natuerlike minne toe slaen doet, vs. 12
 
ghi siet dat ick verdoelt nv gaen moet
 
om v goede ionste te vermijen, vs. 14
15
ghi keert mi den rugge hoemens vermaen doet,
 
druc sonder troost is quaet om te lijen.
 
 
 
V compasselike oghen die zijn verduystert,
 
uwen wille recht als die weerhaen drayt,
 
v vierighe liefde is ouer ghebluystert, vs. 19
20
+ ist wonder al is mijn herte ontpayt? vs. 20
 
v soete woordekens vindic versayt, vs. 21
 
lueghenachtich, om mijn herte doorsnijden,
 
dies wrake der fortunen die mi dat rayt;
 
druck sonder troost is quaet om lijden.
 
 
25
O lief alderliefste, spreect in tgheuoelen, vs. 25
 
hoe mach vierighe liefde so haest vercoelen,
 
hoe mach liefde dus voor den cruepelen manck gaen, vs. 27
 
hoe mach yemant so hert zijn int geuoelen
 
datsi haers liefs miskief voor sanck slaen, vs. 29
30
daer therte waent liefs liefde te vertijen; vs. 30
 
wee hem allen die sulcken vanck vaen,
 
want druck sonder troost is quaet om lijen.
 
 
 
Princesse
 
Ghi weet dat v imagie puerlijck
 
bouen al die weerelt van mi bemint is,
35
hoe muechdi dan sijn so onnatuerlick
 
dat v herte tot miwaert niet ghewint is.
 
troostmi nv bloeme, als een die wel gesint is
 
om inder vruechden pat te schrijen
 
en geeft mi troost daer troost bekint is, vs. 39
40
want druck sonder troost is quaet om lijen.

Vorige Volgende