Archief voor kerkelijke en wereldsche geschiedenissen, inzonderheid van Utrecht. Deel 5

V. Bisschop Filips van Bourgondie, aan die van Abcoude. (1523).

Lieuwe getruwe. Soe die tyt thans aenstaet van der vryer jaermerct in onser heerlycheyt van Abcou, ende wy verstaen, dat men van olden heercomen, gedurende deselve jaermerct

[p. 297]

binnen onser heerlicheyt voorscr. met henscomens recht gewoenlic es te holden van alle saken ende gebreken, die dan aldaer vallen moghen, welcke henscomens tot vorderinge vanden parteyen sculdich syn enen yegelicken recht te laten wederfaren, compt ons by nu daer gebreck inne vallen solde, als dat de voorscr. henscomens niet langer te recht sitten willen, dan der tyt vanden vryen jaermerct gedurende, treckende daernae voerts hoers weghes, tot achterdeele vanden ghenen, die voer den rechte te doen moghen hebben; dus willen wy, dat ghy den voorn. henscomens van onsen weghen daertoe holden ende gebieden, als wat saken duerende den tyt ende vryheid vande voorscreven jaermerct voor hun aengheheven worden, dat sy die voleinden, ende niet en vertrecken, al eest die tyt vanden jaermerct omme gecomen sy, ter tyt toe zy alle saken, soe binnen tyt vanden jaermerct voor hen aengheheven, volcomelicken geeindet sellen hebben. Mede willen wy, dat ghy sulcke rechticheden ende vryheden, als ons binnen den voorsz. jaermerct toecomen van uwes ampts weghen voortsaen ende verantwoorden ende tegens den onwilligen doen ende procederen, als dat na recht behoert, ende hier niet in en versuymen; sulcx is onse ernstelike meninghe. God sy met u. Gescreven Duerstede, xxiii. Augusti anno xxiii.

(Naar eene oorspronkelijke minute).