Archief voor kerkelijke en wereldsche geschiedenissen, inzonderheid van Utrecht. Deel 5

XXX.

Myn Heere.

UE. missive vanden 27. deser heb ick huyden morgen well ontfangen, ende daer vuyt eerst verstaen d'expeditie vanden raide van state herwerts, ende terstont daer nae, dat heur E. gister avont hier gecommen zyn. Ende hebben omtrent zeven uren doen laden die magistraet, die vergadert zynde, es zyn Gen. graeff ernst van Nassauw met den raidt binnen gecommen, hebben overgelevert huere brieven van credentie, zoe vanden heeren staten generael als van zyne Excell., ende die by den secretaris gelesen zynde, de magistraet aengeseyt, dat zy haer souden ontslagen houden van hueren eedt; Canther hadde daerop geseyt, dat huer E. soude gelieven een weynich te vertrecken, ten eynde hy daerop mochte met den raidt delibereren ende antwoorden, ofte dat de magistraet inden groene camer tot dien eynde mochte gaen, daerop by zyn Gen. ende raide van state geseyt worde, dat de will vande H.M. heeren staten generael was, dat zy haer zouden ontslagen houden van haeren eedt; Canther seyde daerop, dewyll het anders nyet wesen en mocht, dat hy hen hielt voer ontslagen, ende dat die vande raedt van gelycken doen mochten, zyn daernae terstont gescheyden; middelretydt bleven die poerten gesloten, de Noey werde beset met vier compaignien soldaten, die Ganssemerckt ende plaetse elcx met twee compaignien, daer nae worden de wachtmeesters ontboden, ende hemluyden aengeseyt, dat de heeren staten generael haer continueerden in haeren staet, op den eedt, die zy voermaels gedaen hadden,

[p. 153]

ende worden vermaent van haer debvoir. Terstont daernaer worde geladen die oude magistraet, ende een bode gesonden aenden heere van Rysenburch, die op zyn huys is, ende noch nyet binnen gecommen, ende naedat d'selve magistraet den eedt gedaen hadde, is by den deurwaerder vanden raide van state een generael pardoen affgelesen, dat het all vergeven ende vergeten soude wesen, mits dat een yegelick hem voirtaen in stilheyt soude dragen, zyn Gen. graeff Ernst, die raidt van state, schout ende schepenen, lagen mede inde vensteren; die wachtmeesters werden te nacht by zyn Gen. ontboden, om overall scherpelick toe te sien, offter oick elders eenige vergaderinge gehouden worde; zyn Gen. sont haer oock geduyrende de voorseyde veranderinge deur de stadt, om te vernemen watter omme ginck; ende seyden nyet vernomen te hebben, dan boven inde stadt quam een, die seyde, dat de magistraet offgeset worde, daerover dat veele vensters inder haest gesloten werden, vuyt vreese. Sommige vrouwen spraecken well qualick, maer de mans hielden haer stille; die voorsteden waren, vermits den saterdach, voll volcx, ende de poerten worden eerst geopent omtrent negen uren, omtrent welcken tydt es den ambassadeur van Venetien met 18 waghens, die myn heeren hebben doen huyren, vertrocken naer Leyden; hy is gister over dach hier still geweest. Zyn Gen. graeff Ernst heeft hem overall geleyt ende die stadt laten besien, myn heeren hebben die kosten affgesproecken. Myn heeren Berck ende Eck hebben hem dickwils wesen vergasten; Canther was eergister avont by hem, syn Gen. hadde oock doen verschryven drye compaignien soldaten, die omtrent 7 uren quamen voir Tollesteech ende S^te Catrynen; die vane ruyter van zyn Excell. quaemen omtrent acht uren voir de Wittevrouwen, die twee vendel soldaten, die op de plaetse stonden, vertrocken omtrent halff twaelff uren voir de publicatie, vande plaetse naer haer logementen; die vendels op den Oey ende Ganssemerckt, staen daer noch; men seyt dat de compaignien van zyn Gen. graeff Henrick ende graeff Ernst van Nassauw hier vuyt trecken ende twee Engelsche compaignien weder inde plaets sullen commen. Die huysfrouwe van Petit es gister avont in den heere gerust. Nu terstont es my geseyt, dat de heere van Rysenburch binnen gecommen es. Biddende Godt hiermede UE.,

Myn heere, nae myn dienstige gebiedenisse, te sparen in voirspoet ende gesontheyt. Ilents Utrecht, den 28. Aprilis 1610, omtrent half twee uren.

UE. dienstwilliger,

G. Tersteghe.

Die burgermeester Both heeft my geseyt, datter nyemant vanden oude magistraet swaricheyt maeckte in 't doen vanden eedt, behalven Nyepoirt ende Werchoven, die vraechden off men over het gepasseerde oeck eenige informaetie nemen off recherge doen soude, ende verstaen hebbende van het generael pardoen, deden mede als d'anderen.

Opschr.: Aen myn heere etc. Gillis van Ledenberch, secretaris van myn heeren die staten 'slants van Utrecht, nu te 's Gravenhaghe.

R^a. (?) Aprilis, 1610.