XI.
Monsieur Huygens.
Ick heb tot noch toe vertrocken Uwer E. te schryven, wachtende opte uytcoempt vanden handel des stilstants, ende alsoe hier nu tydinghe comen, dat daeraf een goet synde te verwachten staet, en heb ick niet langer willen vertrecken voirder openinge te doen van 't geene ick UE. als eenen vertrouwenden vriendt, in den Haghe lest weesende, hadde verclaert, blyvende als noch daerby; ende soude derhalven wel begheren te weeten, off Uwe E. metten goeden heer, doen ter tyt voirgestelt, dyenaengaende gesproken heeft, om zyn meyninghe te weten, ende alsdan in voirder gespreck te commen. Uwe E. sal gelieven my hierop te antwoorden.
Voirder heb ick tot noch toe mynen controlleur syn gagien van maendt te maendt betaelt, nyet teghenstaende, dat my de handt byden ontfangher generael was gesloeten, op hoepe, dat den raedt in dese betalingen sal passeren. Hy quellt my daerom, want de heere hebbet van doen; hy geeft my hoepe, dat hy by acte vanden raedt d'inhibitie sal doen casseren, ende dat hy tot dyen eynde aen UE. ende andere goede heeren heeft gescreven; watter af is, is my onbekent; soude derhalven wel begheren, dat UE, onbeswaert wilde wesen, my te waerschuwen, wat hyer af te verwachten is.
Mons. Huygens, Uwer E. inde bescherminghe des Almogenden beveelende. Uyt Nymeghen, den 23. Jan., anno 1609.
Uwer E. dienstw. vrindt,
D. Vrients.
Opschr.: Erentv. achtbaren etc. heeren Christiaen Huygens, secret. vd. raedt v. state etc. in 's Gravenh.
Auteursrechtvrij