De warachtighe fabulen der dieren

[p. 182]

[De Vvuvve zieck ligghende]

Eere men God beweghen moet

In voorspoet ende teghenspoet.

Iob. 2.

EIst zoo dat wy van Gods handt
Ontfanghen t'goede,
Waerom zulwy oock niet met dancbarich verstandt
En blijden moede:
t' Quaet oock niet ontfanghen in iegenspoede.

Eccl. 2.

LYdt dat v God te lijdene gheeft
Al dat v wordt toe gheschiet, ontfanght
In lijden verdraeght, en verduldich leeft
God d'Heere van al zijn gratien danct.

[p. 183]

De Vvuvve zieck ligghende

EEn Wuwe lagh cranck // van ziecten franck
Ieghens haren danck // dies zocht een vondt
Om wesen eer Lanck // wt dat bedwanck
Vrij ende vranck // inder Voghelen zangh
Ende zijn ghezondt:
Huer moer heeftse gheropen terstondt
Datse haer zou helpen // haer lijden stelpen
Maer heeft goet rondt
Huer eenichsins willen moeyen met yet,
Dan huer ghestraft daer
Als zou was voorspoedich // daer zy haer op verliet
Ouerdochter niet,
Watter volghen zou naer // wien zy zou eeren voorwaer
Bleef ligghende dies // zonder troostbaer verkies
Met vrienden verlies // in lijden zwaer
Hebbende bevlect der Goden Outaer
Midts voorspoet verdooft
Huer gheensins ghespent // van zulck regiment
Noch oock ghekent huer huererhooft,
Heeft dies alleene // ghelaten in weene
Met secours cleene
Pacientie (huer ondancx) gheel ouerstooft:
Wee die gherooft hebt, want zulc oock werden berooft.

¶

Die God niet en danct in zijn leuens staet

Hoe dat men hem gaet
Als hem ouervalt dan ziecte groot
d,Heere God almachtich hem oock verlaett,
Lettel troost ontstaet
In vreesen moet hy steruen de tweeste doodt.