De warachtighe fabulen der dieren

[p. 66]

[d'Henne ghedoodt om de eyeren]

Te ghierich verkiesen,

Doet somtijts verliesen.

Prouerb. 14.

DE ooghe der ghierighen es onverzaedich quaet
Int deel der ongherechticheyt, die altijts begheere
Meer ende meer, hy en sal niet werden verzaedt
Tot hy verderuende, zyn ziele verteere.

1. Timoth. 6.

DIe wortele van alle quaden
Es begheerlicheyt des gelts niet om verzaeden
't Welck zommich begheerende, zoo wy aenschauwen
Hebben ghedoolt van t'Ghelooue in boose daeden
Wilt dan op den rijckdom niet betrauwen.

[p. 67]

d'Henne ghedoodt om de eyeren.

EEn ghierighe Corre, om yet te gheuene ley
Had een ionghe Henne zoo van natueren
Die haer alle daghe leyde een gouden Ey
Wieder maecte gheschrey
Vroylicheyt moester haer by ghebeuren
Dies rijckdom vercreechse door t'langhe ghedueren,
Die eerst was aerme omtmoedert ontvadert
Nochtans bleefse in huer ghierighe cueren
Om raepen ende scraepen altijts vroom ghe-adert:
Zulck ghebruuct somtijts minst, dat hy heeft vergadert.

¶ Nochtans van ghiericheyt niet zijnde vervult

Dochte de Henne was binnen verguldt
Dus om den schadt gheheel hebben rasch onbezweken
Zonder advijs den hals af ghesteken:
Zou ghierich brandende heeft binnen ghekeken
Meende den proy hebben teenegaer ghecreghen
En vandtter niet anderssins in ghebleken
Dan zoo ander Hennen te zijne pleghen,
En was qualick bedeghen, Doe sprack zy versaeght:
Als een zaeke ghedaen es, eist te laete gheclaeght.

Sghelijcx de sulcke es eeghin wijs

Die haestich sijn voor nemen te doene beslaet
Zonder rijpen raedt, ofte voor-advijs
Want dan hem d'ongheluc meest dobbel slaet:
De mensche obstinaet, Die met sijn hooft door gaet,
Waent somtijts wesen soo expeert
En veel te winnen, maer den eyndt is quaet,
De ghiericheyt alle wijsheyt en t'proffijt wt weerdt.