De warachtighe fabulen der dieren

[p. 50]

[Ram ende Stier]

Zulck clemt, haest daelt,

Zulck waent, die faelt,

Prouerb. 15. Luce. 1. Psal. 74.

DE Heere sal thuus des houeerdighen breken
Hy wederstaetse, en salse van haer stoelen steken,
Dus en wilt v hoornen van sterckte of ghewelt
Niet verheffen, verwaent zijn noch spreken:
Maer oodtmoedich v met uwen roup te vreden stelt
Op dat ghy den Heere uwen God niet en quelt.

[p. 51]

Ram ende Stier.

EEnen Ram bouen d'ander in hoorens zeer sterck
Die onder hemlien was ghevreest en ontzien
Regierdet daer al, maecter nieuwers af werck
Zoo nauwe hield hijse in zyn bevanghen perck
Dat zy voor hem bevreest boghen de knien:
Hoe vroom eenighe waren moesten hem eere bien
Ende dorsten gheenssins ieghens hem opstaen
Dit ziende hem betrauwende ter causen van dien
Meende ander dieren oock te doen vlien,
Maer heeft ander loon naer zijn werck ontfaen

¶ Den Ram dus verwaent zach commen eenen Stier

Dien hy waende vertucken, en lieper teghen vp t'velt,
Maerden Stier ghewapent zijnde ieghens zulck dangier
Heeft hem met zyn hoornen daer teghen ghestelt
Zoo dat den Ram wiert met duuselijnghe ghequelt
En viel eers ouer bolle, gheheel in onmachte:
Dit ziende een ander Ram, heeft met hem gherelt
Om dat hy zulck ongheluck niet en voordachte
En zeyde: dat elck dit ziende, voor perijckel wachte.

Zoo vindmen oock menschen cleene van staten

Als zij yet verbueueren, hem terstont verheffen
Niet alleene onder huer ondersaten
Maer willen den handel der machtighe bevatten:
Hem zeluen niet kennen, noch wiese zijn beseffen.