De warachtighe fabulen der dieren

[p. 24]

[Duuen ende Hauick]

Oorloghe ende wreedthede,

Brijnght groot leedt mede.

Eccl. 25

EEndrachtigheyt der Broederen, de liefde daer naer
Elck met zijnen naesten, ende bouen desen
Man ende Wijf met elck anderen eerbaer
Een in een paer:
Wel ouer een draghende voorwaer,
Dese zijn voor God, en den mensche ghepresen.

Iere. 2.

ZOuckt de vrede vander stede
Met die v mede zijn,
Want die goede vrede:
Sal hulieder vrede, zijn.

[p. 25]

Duuen ende Hauick.

DE Duuen daghelicx hebbende oorlooghe strijdt
Ieghens de Wuwe, die hemlieden benijdt
In eeuwigher tijdt:
Aen een vrome voghel secours ghijnghen zoucken
Op dat zy daer teghens mochten wesen bevrijdt
Met eenen trop wijdt
Zijn totten Hauick ghevloghen met een vercloucken
Begheerende dat hy zoude willen roucken
Haren Conijnck te zijne, t'welck hy heeft ghedaen,
Doende zyn intreye vlooch wt in allen houcken
Heeft gheen vande Duuen in gracien ontfaen:
Die hem onderdanich stelt, moet te wille staen.

¶ Nietmin dan datse de Wuwe wilde vervolghen

Es den Hauick partielick den Duuen bedeghen
Veel gheuanghen, ontpluumt, ende t'vleesch verzwolghen,
Hy en lieter gheene vrij, te gheenen weghen
Nochtans als Conijnck behoorde tzijne gheneghen
Om hemlieden te beschermen, en t'houden in vrede
Esser gh'eel contrarie gheuallen tseghen
Meer quaets doende, dan huerlieder vyandt dede
Dit ziende de Duuen, met leedtzaemhede
Hebbent beclaecht, en bekent veel lieuer ter noodt
Oorlooghschen strijdt ghedooghen en lijden mede
Dan van andere lijden ouerdaet groot:
Honghereghe Vlieghen die bijten totter doodt.

Zoo hebben oock d'onnoosel altijts ongheluck

Voor een lettel verblijden, lijden meest ongheluck
Eßer paeys binnen tlandts, vremde commense beroeren,
V prijsende tzaemen, elc crijchter wt syn pluck
D'een verstroyt metten oorlooghsche tamboeren,
D'ander ieghens haer eyghen landtzaeten rumoeren.