De warachtighe fabulen der dieren

[p. 16]

[Van den ouden Hondt]

Liefde int ghelaet,

Is niet zonder daedt.

Ephef. 6 Collo. 4. Eccl. 7. ende 23.

GHy Heeren doet v dienaers ghelijck en recht
Wetende dat ghy hebt een Heere int eeuwich leuen
Laet v dreeghen, hemlien niet te veel oplecht:
Maer houdt maete, en wilt elck tzijne gheuen,
Want al zijdy ny Meester, en hooghe verheuen,
God (die alle gherechticheyt sal loonen)
Die en is gheen wtnemer van persoonen.

[p. 17]

Van den ouden Hondt.

EEn Ioncker had onder andre eenen quaden hondt
Die bouen alle andere wiste den vondt
Als hy ionck was om dapperlick twild t'angorden
Hy ghijncker mede wt op eenen moorghenstondt
Maer zyn beenen waren gheheel traech gheworden:
Een Hert wierter opghedaen, maer als d'ander porden
Midts crepelheyt, was niet tot loopen gheneghen,
Den Hert ontrochte, dies wiert hy met voeten ghetorden
Den ouden hondt, van zyn Meester vul ondeghen.
Dat de natuere breekt en veroudt, wie macher teghen?

¶ Den Hondt hem vijndende onredelick ghesmeten

Voor zyn eten,
Badt dat hem zyn Meester t'ghebreck zou vergheuen
Midts d'oude en langhe diensten // oock zoude weten
En niet vergheten
Dat hy beter ghedaen hadde in zijn ionghe leuen:
Eylaes (baste D'hondt) ick zie nv watter is bedreuen
V en behaeght niet dan daer af comt proffijt,
In mijn ionckheyt hebdy my eere toe ghescreuen
Nv achter bleuen:
En in d'oude ghij my verstekende zijt,
De vriendtschap in voorspoet duert maer cleenen tijt.

Zoo sietmen daghelicx oock gheschieden

Onder Edel, onedel, en poorters lieden
Zoo langhe zij van haer dienaers dienst verweruen
Zalmense touven, en schoon ghelaet bieden,
Dat elck zie toe, voor zijn bederuen
Want sheeren dienst dat en es gheen eruen.