Eduard de Dene. Testament rhetoricael

[p. 165]

⁺ Deerste Liedeken
Ad te leuaui oculos meos
Dauids .122.^e psalme
Vpden. Voys het daeghet huuten oosten
het Lichtet ouer Al

Thuvvaerts hief ick myn ooghen
(tvleesch ieghens den gheest meest stuent)
wilt my hu zaelichede tooghen
ghij die inden hemele wuendt

Ziet zoo met Neerstichede
Al omme een goet gheschien
die ooghen der dienstknechten mede
vp dhanden huers meesters zien

Soo oock neerstich Anschauvven
die ooghen van een dienstwyf
al vp die handen huerder vrauwen
ghestadelick int beclyf

Ons ooghen zoo ghestadich
zien vpden heer onsen god
Tot dat hy ons worde ghenadich
die staen onder zyn ghebod

Weist ons ghenaedich heere
Onslieden ghenaedich zyt
want met versmadenesse zeere
zyn wy vervult tdeser Tydt

Want onse ziele Claerlick
es zeere vervult Certeyn
end een verwyt nv openbaerlick
gheworden int eerdsche pleyn

Gloria patri

Glorye zy den vader
de zuene / den helighen gheest
zoo die was / Es / en blyft Algader
Gheel onverghanghelick meest /

+ 83 v