Occasio arrepta. Neglecta

[p. 293]

Schema VII.
Dum Tempvs labitur, Occasionem fronte capillatâ remorantur.

Occasio, Drusillus, Tempus, Tornus, Storia, Mirandulus, Darotistus, Angelus.

Occas.

NVnc fas est alios terrarumque inuisere tractus,
Auxiliumque ansamque aliis offerre. Valete.

Drusill.

Siccine destituas tam raros cara sodales?

Temp.

Sic opus est.

Torn.

Quare?

Temp.

Num sede moremur in vná?

Stor.

Quaeso mane.

Occas.

Accelera frater; dextraque prehensam
Tolle ab humo, atque alias subitò me transfer in oras.

Mirand.

Te sine vt exorem, Tempvs.

Temp.

Res pernegat.

Torn.

Ergo,
Si tibi tanta fugae lex est; Occasio saltem
Tardet adhuc; nostrique vt par est iure fruatur
Hospitij.

Occas.

Cur tot nequidquam verba per auras
Perditis? Hinc aliò, mora nulla, recedo. Valete.

Drusill.

Non tam vana sedet nostrae sententia menti.
Huc socij, conferte manus. Occasio tristi
Ardet abire fugâ, nostrae spes vna salutis.

Stor.

Dextram age tu Darotiste tene.

Darot.

Tu Torne sinistram.

Drus.

Vim faciat? passos potiùs pro fronte capillos

[p. 294]

 

Arripiam, quàm se nostris subducat ocellis.

 

Occas.

 

Ai, sine, sponte sequar. Sum victa; istisque morabor

 

Aedibus, ad iustam dum vos prouexero metam.

 

Drusill.

 

Hac lege implicitis feriantur foedera dextris.

 

Occas.

 

Lex placet; implicitis feriantur foedera dextris.

 

Ang.

 

Laudo praestantes Iuuenes, & pectora fida.

 

Vis illata placet: neque fert Occasio iniquè

 

Hoc vehemens studium: gaudet se denique cogi.

 

Drusill.

 

Nuncie siderei Regni, Dux inclyte nostrae

 

Praesidiumque domus, quî dignâ voce canamus

 

Te laudesque tuas? Vtinam pro munere tanto,

 

Dum nihil occurrit dignum, vice muneris, omnes

 

Nos habeas: qualique modò dignatus amore es,

 

Dum duce te Tempvs diuesque Occasio rerum

 

Nostras deuenére domos; ita deînde morari

 

Ne pigeat; nostrosque optato calle labores

 

Dirigere, & teneros tot contra aduersa tueri;

 

Vt vult nostra salus, & magni gloria Regis.

 

Ang.

 

Fidite, non deero: superá promittitur arce

 

Auxilium.

 

Drusill.

 

Grates agimus.

 

Torn.

 

Iam, Occasio, nostra

 

Tecta subi, pactos nobis haesura per annos.

 

Drusill.

 

Sic laeto vultu & dulci sermone fruemur.