pen wijden, met sout, asschen, ende wijn, om de autaren mede te wijden, ende tot andere sulcke heylighe vsancien ende ghebruyck. Hiertoe dienen oock die ghewijde keerssen, die-men op H. Lichtmisse dagh pleeght te wijden. Item palm-tacken, oft andere meykens, die-men op den Palm-son-dagh wijdt. Ende elck dient bysonder soo ghebruyckt, soo't ghewijdt werdt. Het wij-water, om te besproeyen: de ghewijde keersse, om te ontsteken: de palm-tackskens oft andere, om erghens te houden oft te steken. Als oock naementlijck het Agnus Dei, om aenden hals te draghen, oft elders te voeghen, soo't beqaumelijckst ist met reuerentie. Het welcke eygentlijck vanden Paus daer toe ghewijdt werdt, om tegen al het quaedt op-stel des vyandts bevrijdt ende beschermt te worden, oock te water ende te lande, in brande ende anderen noodt. Hier van hebben wy breeder gheschreuen in onsen Christelijcken Bie-corf, in't viij. Capitel van't vij. stuck. Hier by dient seer wel het teecken van t'heyligh Cruys, d'welck de Christenen al-tijdts ghereedt moeten hebben, teghen alle aen-vechtinghen des vyandts, inwendigh ende uytwendigh. Het welck-men in de H. Kercke niet alleen en ghebruyckt in alle wijdinghen, ghebenedijdinghen, ende bedienen der H. Sacramenten, maer oock sonderlinghe in d'besweeren der boose gheesten, in d'belesen der ghequolene menschen, ende in als dat-men is doende om de argheydt ende vyandtschap des duyuels te weder-staen, te breken, ende te niet te brenghen. Van t'goedt ghebruyck ende cracht des heylighs Cruys, leeft breeder in't xlj. Capitel van onsen Christelijcken Waerseggher.
Maer van dese ghewijde dinghen een derde te maecken, met die, oft eenighe van dien, te samen te menghelen, oft eenighe andere dinghen daer toe te doen, soo sommighe haer verstouten te doen, om daer mede toouerije oft eenighe quellinghen te verdrijuen, dat is ongheorlooft, ende buyten d'ordinantie der H. Kercke.
Ende daerom, dit moet veur eenen sekeren, vasten, ende ghemeynen regel ghehouden worden: Al t'ghene, dat noch uyt sy seluen, oft uyt eenighe cracht sijnder nature, noch uyt d'in-stellen ende maght Godts (ghelijck de H. Sacramenten wercken) noch uyt d'ordinantie der H. Kercken, (die oock met Godts woordt ende cracht in alle haere saecken te werck gaet) Al t'ghene, seggh'ick, dat uyt ghene van alle dese manieren, veur eenigh remedie ieuers toe en dient, noch cracht en heeft: ist saecke dat-men't tot sulcks nochtans vermeet te ghebruycken, dat is al quaedt, superstitieus, teghen Godt, sijn woordt, ende wille. Ende niet teghen-staende, siet eens, hoe vele onverstandighe ende ongheduchte menschen, daghelijcks haer zijn in dit mis-bruyck ende ongheorloofden handel verstoutende. De ghe-
Auteursrechtvrij