die meer ende eer hebben goede godtvruchtighe ende ongheleerde, dan die gheleerder zijn ende niet soo goedt van leuen. Nerghens van en is de boose gheest, met alle de sijne, soo vervaert, als van een suyuer herte, ende ootmoedighe simpelheydt, oft simpele ootmoedigheydt. Des wy lesen, hoe Paulus den Heremijt, (ghenoemt den Simpelen) Sinte Anteunis discipel, veel duyuelen uyt-wierp, die S. Antonius selue niet en coste veriaghen. Ende ouer-sulcks, Antonius de arme besetene oft betoouerde menschen, dick-mael van hem selue sandt tot den Simpelen Paulus, daer sy hulpe vercregen. Waer uyt volght, dat, soo wie hem seluen moeyen wilt, met betoouerde menschen te helpen, ende teghen den boosen vyandt te strijden, dat hy wel gade moet slaen, ende ghedachtigh wesen, t'ghene dat hem vanden Bisschop gheseyt wierdt, als hy hem Exorcist maeckte in sijn wijdinghe, ende maght gaf ouer de boose gheesten. Te weten, dat hy eerst alle onsuyuerheydt ende boosheydt der sonden uyt sy seluen werpe, eer hy hem gaet stellen, om eenen anderen vanden boosen gheest te verlossen.
Maer dat ghebreck regneertter onder de menschen, dat sy meer loopen sullen, tot eenighe priesters, oft religieusen, die vande ghestichtighste niet en zijn, behoudens dat sy stout van begrijpe zijn, ende hun met sulcks moeyen, oft deur eenighe ongheorlofde manieren van doen, die sy van andere haers ghelijcke gheleert hebben, oft die sy onder 'tdecksel van goede gheapprobeerde middelen, selue versieren: eer sal men tot sulcke, oft oock die d'een toouerije met d'ander verdrijuen, comen, dan tot eenighe goede ende ghestichtighe verstandighe mannen. Denckende alleenelijck: My en roecks, magh ick gheholpen werden, in wat manieren datt oock moghte wesen. Dat is al seer onbedachtelijck, ende teghen alle reden te wercke ghegaen, in een soo groote saecke, daer verlies van siele op loopt.
Auteursrechtvrij