Christeliicken waerseggher

Cap. XVIII.
Hoe het aen-mercken van t'draeyen der wielen eenen hoogh-moedighen coninck beweeght heeft.

OP dat wy nu op d'leste iet segghen ten aen-sien van onse Rolle; laet ons nu eens hooren, iae als veur ooghen sien, hoe dat Sesostris coninck van Egypten uyter maten hooueerdigh, deur d'aen-mercken der draeyende wielen aenden waghen, den hooghen moedt heeft laten sincken, ende hem seer verootmoedight heeft.

⁺Desen seer groot ende maghtigh zijnde, heeft hem verscheyden natien van volck onder-worpen, ende is deur sijn groote victorien ende moghentheydt soo ouer-willigh ende grootsch gheworden, dat hy eenen gouden waghen heeft doen maecken, met verscheyden costelijcke ghesteenten verciert. In welcken waghen hy sittende, heeft vier coninghen (van de ghene die hy t'onder-ghebraght hadde) t'goreel ouer t'hoofdt stropende, aenden waghen ghelijckelijck in-ghe-

+ Niceph. lib.17. cap. 29.

[p. 371]

spannen, ende soo doen trecken in de stede van peerden. Soo dit dickmael te doen was, namelijck eens op eenen feestelijcken dagh, als solennelijck ten spele ende ten tooghe rijdende, een van die vier treckende coningen sagh al om, op de raeyers ende draeyende wielen, achter hem om siende al treckende. Sesostris de coninck vraeghde hem wat hem lettede, dat hy soo altijdts om sagh, soo gaf hy veur antwoorde: Heer coninck, ick sie met groot verwonderen op die wielen, aen-merckende hoe onghestadigh dat sy zijn: ende dat nu d'een sijde bouen is, ende dan wederom onder: ende dat nu onder is, dat dat wederom bouen comt. Sesostris verstandt crijghende, beval datmen die vier coninghen uyt spannen soude, ende niet meer en soude laten trecken. Want de onghestadigheydt des weerelts aenmerckende, heeft hem bedacht, ende beghinnen te vreesen, dat hy wel eens noch moghte vernedert worden, ende by auonture sy-lieden bouen hem verheuen, soo die wielen te kennen gauen.

Oft Godt gaue, dat alle sotte minnaers des Weerelts, ende die op den ijdelen roem den moedt soo hoogh draghen, den seluen wat lieten sincken, deur d'aenmercken der onghestadigheydt, van alle aerdtsche dinghen, ende vanden gheheelen loop des weerelts.