Christeliicken waerseggher

Cap. XVI.
Deur het exempel vanden Keyser Heraclius werdt Gods ghehenghenisse wonderlijck verclaert.

NOch naerder dan al de veur-gaende comt op ons goedt veur-ghenomen gebruyck der Rolle van Devgdsaemheydt, het ghene dat wy vanden keyser Heraclius lesen, in d'iaer 622. Hy dede gheheel zijn heyr suyuerlijck⁺ ende godtvruchtelijck leuen, drij daghen lanck verwachtende, dat Godt hen-lieden in eenigher maniere soude te kennen gheuen, wat hem beliefde dat sy doen souden. Heraclius dan, van Godt ghemaent zijnde, heeft gheschickt in Albanien te winteren. Dit dede hy, soo Cedrenus beschrijft, in deser manieren: Hy dede sijn volck drij⁺ daghen langh monstre passeren, ende wel ouer-sien: ende als-dan heeft hy den heylighen Euangelie-boeck, oft het nieuwe Testament ghe-

+ Baronisus tom.8.

+ Cedrenus.

[p. 368]

nomen, ende open doende, heeft bevonden, als oft hem Godt heymelijck daer deur ghewaerschouwt hadde, in Albanien te winteren.

Dat dese maniere, van hem in noodt met Godt te beraden, dickmael in t'ghebruyck was, t'zij met het openen van het nieuwe Testament, oft van de gheheele H. Schrifture, dat blijckt uyt verscheyden historien: soo ghy in d'naeste Capitel sult aen-mercken.

Heraclius het nieuwe Testament open doende, vondt daer by auonture die plaets van S. Paulus, daer hy tot de Corinthianen⁺ schrijft: Veniam autem ad vos, cùm Macedoniam pertransibo. Nam Macedoniam pertransibo. Apud vos autem forsitan manebo.; vel etiam hiemabo: Ick sal tot u-lieden comen, als ick Macedonien deur-gaen sal: want ick sal te Macedonien passeren. Maer by u-lieden sal ick by auonturen blijuen: oft oock verwinteren. Oft hy mocht die plaets, ten goeden ghelucke, in d'openen des boecks vonden hebben, daer Sinte Paulus tot Titum seght: Festina ad me venire Nicopolim: ibi enim statui hiemare: Haest v tot Nicopolen tot my te comen: want ick hebbe daer gheschickt te verwinteren.

+ 1.Cor.16.