Christeliicken waerseggher

Cap. XV.
De verkiesinghe van S. Marten tot het bisdom, wonderlijck deur Godts beschicken, met het lesen van eenen Psalm bevestight.

WIe soude daer aen connen twijfelen, oft den seluen Heere, deur sijn goddelijcke veursienigheydt, en heeft het verkiesen van S. Marten om bischop te worden bevestight, midts het lesen van eenen Psalm, soo het ghelucktte? Waer mede oock opentlijck verstooten wierdt, den ghenen die het veurseyde verkiesen ghesocht hadde te beletten. Maer laet ons hooren en sien, hoe dit gheschiedde.

De heylighe Martinus wierdt met de eendraghtighe stemmen ende begheerten van alle den volcke ende die't aen-gingh ghecoren, om bisschop van Tours te worden. Die kercke rekenende gheluckigh te

[p. 367]

wesen, die sulck een weerdigh heyligh man veur bisschop soude crijghen. Maer eenighe nochtans waerender, die't sochten te beletten, segghende dat hy te slecht ende te verworpen van persoone was, magher in t'habijt, versmadelijck in d'uytwendigh ghelaet, ende den bisschoppelijcken staet en stoel onweerdigh. Maer t'ghevoelen van dese weder-staenders wierdt t'eene-mael verworpen, midts sy den heylighen man Godts te meer presen, hoe sy hem te meer schenen te verachten, met sulcken saecken naer te segghen, die de Heylighen Godts betaemen.

Onder al, was daer eenen, by naeme, Defensor, die hem meest daer teghen stelde: maer wierdt wonderlijck deur Godts ghehinghen verstooten. Want, soo de Leser in S. Martins wijdinghe, midts het droomen vanden volcke, niet in-gheraecken en cost, ende een ander met haeste onversiens den Psaulter van Dauid ter handt nam, ende by ghelucke, soo't viel, las daer hy hem eerst open dede: soo gevielt veur d'eerste, op dese woorden, staende inden achtsten Psalm: Ex ore infantium & lactentium perfecisti laudem, propter inimicos⁺ tuos, vt destruas inimicum & Defensorem: Ghy hebt, o Heere, uwen lof uytten monde der cleyne suyghende kinderen volmaeckt: op dat ghy den vyandt, ende den wreker verdoen soudt.

Dese woorden ouer-luydt ghelesen zijnde, al het volck heeft seer verblijdt gheweest, ende de teghen-partije is beschaemt gheworden. Want met die selfde sententie wierdt de onnooselheydt ende heyligheydt van S. Marten versekert, ende het quaedt op-stel van dien Defensor (oft Vltor) verworpen.

+ Psal.8.