De Psalmen Davids, ende ander lofsanghen

[p. 175]

Dat Auendt Gebedt.

O Barmhertighe Godt, eewigh licht,⁺ schynende in de duysternisse, Ghy die verdrijft^* de nacht der sonden ende alle blindtheit des herten, Naedien ghy de nacht verordineert hebt om te rusten, gelijck den dagh om te aerbeyden, Wy bidden v, gheeft dat onse lichaemen in vreden ende stillheit rusten, op dat se daernae bequaeme sijn mogen te lyden den aerbeydt, dien se draegen moeten, Maetight onsen slaep, dat die niet onordelick sij, op dat wy aen lyf ende siele onbevleckt moghen blyuen, jae dat onsen slaep selfs geschiede tot uwer eeren. Verlicht⁺ die oogen onses verstands, dat wy in den doodt niet ontslapen, maer altijdt^* verwachten op onse verlossinge wt deser allendicheit. Beschermt ons ooc voor alle⁺ aenuechtingen des duyuels, ons in v heyligh gheleydt nemende, Ende hoe wel

+ 2.Cor. 4,6.

* Ro. 13,12.

+ Ephe. 1,18

* Matt. 24,42. & 25,13 Luc. 12,36.

+ 1.Pet. 5,8. Ephe. 6,11.

[p. 176]

wy desen dach niet toeghebracht hebben, sonder tegen v grootelicks gesondight te hebben, Wy bidden v wilt onse sonden bedecken doer uwe barmherticheit, ghelijck ghy nu alle dinghen op eerden bedeckt hebt, op dat wy daerom van v aenschijn niet verstooten werden. Geeft oock ruste ende troost allen krancken, bedroefden ende aengevochtenen herten, doer onsen HEERE IESVM Christum, die ons also heeft leeren bidden:

Onse Vader, etc.