De Psalmen Davids, ende ander lofsanghen

Psalm CXLV.

De Prophete loeft hier Godts heerlickheit, so wel in der scheppinghe der węerelt, als in de vaederlicke regieringhe des menschelicken gheslachtes, maer voornaemelick der ghener die op Godt betrauwen, ende haeren toevlucht tot hem nemen.

§1

ICK sal Godt mynen Koningh prysen seer,
End uwen heylighen naem louen HEER:
Ick wil Heer uwen naem verbreyden fyn,

[p. *]

 

End v altydt groot macken O Godt myn,

 

Die Heer' is groot end seer hooghlick te prysen,

 

Onbegryplick is hy in aller wysen,

 

Kindts kinderen sullen roemen sijn wercken,

 

End vermonden sijn kracht niet om verstercken.

§2

Ick wil ghedenck n uwer heerlickheit,
Vwer grootheit end uwer maiesteit:
End sal uwe wonderwercken altydt,
Verbreyden Heer met een herte verblydt.

V' daeden een schoon ghetuygenis gheuen,

Van uwer kracht, welck yderman doet beuen:
Dies wil ick altydt end voor allen dinghen,

[p. *]

 

Vwe goetheit louen, prysen end singhen.

§3

Se sullen uwer goedicheit seer groot,
Hiernae sijn een schoon ghedenckteeken bloot,
Sy ghetuyghen van v'gherechticheit,
End van uwe bestendighe waerheit.

De Heer'is ghenaedigh ende goethertigh,

Traegh tot gramschap, end daertoe seer barmhertigh,
Vriendelick is hy allen creaturen,
End hy toont hen sijn goetheit t'allen vren.
***

§4

Dies Heer loeft v al v' schepsel verblydt,
Om dat ghy een volmaeckt werckmeester sijt:
Maer bouen all' uwe wercken niet kleyn,
Prysen v all' uwe heylighen reyn.

Die heerlickheit uwes rycks sy verkonden,

Vwe kracht groot sy daerneuen vermonden.
Op dat de menschen d'heerlickheit end krachten,
Vwes rycks verstaen in allen gheslachten.

§5

V' ryck is Heer'een eewigh Koninghryck,
V' heerschappy blyft eewighlick ghelyck:
Die struyckelen onderhoudt v'handt fyn,
End rechtt op die nedergheslaeghen sijn.

Alle dingh wachtt op v aen allen zyden,

Ghy gheeft hem sijn spys' in bequaemen tyden,
Ghy opent v'handt, end dat beghenaedight,

[p. *]

 

Met spijs' alles ryckelick ghy versaedight.

§6

Godt is gherecht in alles wat hy doet,
End goedertier in al sijn wercken goet.
Hen die hem bidden wil hy nae by staen,
Iae die hem in der waerheit roepen aen.

Hy doet den wille tot haeren vermeeren,

Der ghener die hem vreesen end vereeren:
Hy verhoort haer schreyen end al haer klaegen,
End verlosts' wt al haer kruys end haer plaegen.

§7

Die Godt lief hebben sijn van hem bewaert,
Maer hy verderft gantschlick den boosen aert.
Dies wil ick sijnen lof verkonden klaer,
Iae alle vleesch sal hem louen eenpaer.