De Psalmen Davids, ende ander lofsanghen

Psalm XV.

Dese Psalm leert ons, met wat deughden dat die borgers des hemels verciert wesen moeten.

[p. *]

§1

WIE is't die sal wonen eenpaer,
In v lieflicke tenten Heere?
Wie sal doch verkeeren hier naer,
(Doer v goetheit sonder geuaer)
Op uwen heylgen bergh met eere?

§2

Het sal wesen die mensch' eerbaer,
Die steedts wel doet in allen dingen,
End recht handelt in 't openbaer,
Wiens mondt dat oprecht is end waer,
Gestaedelicken sal voortbringen.

§3

Die gheen achterklap spreeckt onvroet,
Tot synes naesten smaet end schande,
Die tegen hem oock niet misdoet
Noch mishandelt: maer hem behoet,
Voor oneeren menigerhande.

[p. *]

§4

Die oock de godtloosen veracht,
End daertoe eert tot allen stonden,
Hem die den Heer vreest met aendacht,
Die syn beloften heeft volbracht,
Al waer't oock sijn schaede beuonden.

§5

Die tot woecker niet geeft sijn geldt,
End geen gaeuen oyt heeft gepresen
Om t'recht des vromen met geweldt,
Te breken, die so is gestelt,
Sal voorwaer gelucksaligh wesen.