Het oudt Huysken van Bethleem

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

[Och wilt aenmercken ghy weldighe herten]

Op die wijse. Mishouwet soo is den name mijn.

Och wilt aenmercken ghy weldighe herten
V crancke natuere die sterffelijck is
En doet ghys niet het sal v smerten
Als die doot comt die vreeselijck is
Hierom soo wilt v sproyen
Die werelt te verfoyen
Ick leert v als die wijse doet
Wat batet dat ick steruen moet.

Steruen so moeten wy arm en rijcke

Wat willen wy ons vermeten dan?
Die pijne der hellen sal dueren eewelijcke
Hy is wijs diet bevroeden can
Want dansen ende springhen
Het sijn al verganckelijcke dinghen
Die doot neemt ons het leuen soet. wat batet.

Bereyt v huys in corter stonden

Oft die doot sal v den wech ondergaen
Och wee den ghenen die dan steruen in sonden
Die sullen dan loon naer hun werck ontfaen
Als die ooghen sullen keeren
Ende v therte sal faelgeren
Waer blijft dan tgheselschap en daertsche goet
Wat batet al als ick steruen moet

Al sijt ghy beswaert met fantasie

Al sijdy nv beureest al voor de doot
Wilt ghy voordaen nv vromelijck strijen

[p. 151]

 

Godt sal v helpen wt alder noot

 

Aldus leert die werelt haten

 

Ende wilt die sonden laten

 

Die doot cost ons doch vlees en bloet. wat batet

 

Adieu prieel vol alder wellusten

 

Bedriechelijcke werelt cort solaes,

 

Ick wil in Godt gaen soecken mijn ruste

 

Ick moet doch eens worden der wormen aes

 

Wat salt my profiteren

 

Houeren ende kancketeren

 

Als die doot compt snel ende onbehoet.  wat batet

 

Waer sijnse die pleghen te triumpheren

 

Sy sijn ghepasseert men sietse nv niet

 

Wat willen wy dan ghenoechte hanteren

 

Alst eynde niet en is dan verdriet

 

Dus laet ons gaen beghinnen

 

Ons seluen te verwinnen

 

Want de doot cont ras op den staende voet.  wat batet

 

Laet ons nv princelijck leeren steruen

 

Beschreyende met tranen ons misdaet,

 

Ende vreesen den Heere wy en sullen niet bederuen

 

Ende dienen Godt elck in sijnen staet,

 

Want waer wy ons keeren

 

Schriftuere salt ons leeren

 

Dz tegen die doot en is schilt noch boet. wat batet