Het oudt Huysken van Bethleem (1590)

Het oudt Huysken van Bethleem

(1590)–Hendrik de Coster– rechtenstatus

Auteursrechtvrij

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

Vorige Volgende


Een nieu Liedeken vanden verloren sone Een goet nieu lietal vant beghin Dat sal ick gaen verclaren Van eenen vader des huysghesin Soo ons Lucas gaet openbaren Twee sonen heeft hy behouwen Den oudtsten diende hem van passe wel
[pagina 137]
Den ioncxsten was hem seer rebel Alsoomen mocht aenschouwen. Hy sprack o vader zijt des wel vroet Wilt my nv ouergheuen Dats al mijn patrimonie goet Van dat my is ghebleuen Gheeft my dat sonder claghen Dwelck die vader dus heeft ghedaen Om dat hy soude buyten gaen Ende hem seluen wijsselijck draghen. Doen hy dat ghelt hadde ontfaen Alsoomen mocht aenschouwen Heeft hy dat ghelt terstont verdaen Al met die schoone vrouwen Doen hy sijn ghelt was quijte Trocken sy hem sijn cleederen wt Ende lieten hem loopen als een schavuyt Seer aerme van habijte. Daer na quam eenen dieren tijt Dat hy met grooter pijnen Moeste gaen eten des seker sijt Dat draf al met die swijnen Hy sprack met wenenden ooghen Ick wil weder tot mijnen vader gaen (Oft hy my wilde in ghenade ontfaen) Ootmoedicheyt betooghen. Seer haestelijck naer die tijden Ghinck hy die reyse aenveerden Voor sijnen vader sijn sonden belijden Ende viel voor hem ter eerden Hy sprack o Vader ghepresen Ick heb teghen Godt en v veel misdaen Wilt my als een huerlinck ontfaen Ick en ben niet waert v soon te wesen.
[pagina 138]
Doen die Vader dat verstont Ghinck hy sijns soons ontfermen Hy custen hem daer aen sijnen mont Ende nam hem in beyden sijn armen Hy sprack ten seluen tijden Mijn sone die langhe verloren was Is nv gheuonden op die pas Wilt v met my verblijden. Langt mijnen sone dat beste habijt Mijn vrinden wil ick doen nooden Haelt sijnen broeder met iolijt Mijn ghemest calf wil ick doen dooden Hy sprack ten seluen stonden Mijn verloren sone die heb ick ghewacht Welck was dat menschelijck gheslacht Dat Christus heeft geuonden. Den oudtsten soon hoort mijn uermaen Ghinck tot sijnen Vder ghewaghen Voor my (ick ben v onderdaen) En hebdy nout bock gheslaghen Doen sprack die Vader ghepresen Van mijnen goede en hebdy gheen noot Maer uwen broeder die was doot Die is als nv verresen. Al die met sonden sijt belaen En wilt toch niet wanhopen Wilt tot Godt den vader gaen Sijn gratie staet altijt open Ende wilt v sonden bekermen Ende laet v sonden v wesen leet Want Godt is altijt bereet Om de sondaer te ontfermen. Amen.

Vorige Volgende

Over dit hoofdstuk/artikel

lied

Naar de Nederlandse Liederenbank