Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
Op die wijse. Die voghelkens inder muyten.Compt al van Zuyden ende Oosten
Die met sonden sijt beladen
Ick sal v selfs vertrooste
Met mijn vleesch sal ick v versaden
| |
[pagina 135]
| |
Ick ben die fonteyne verheuen
Die dorst heeft die come naer
Die daer wt drinckt sal eewich leuen
Spreeckt Christus int openbaer.
Ick en ben hier niet ghecommen
O menschen sijt des vroet
Dat ick v soude verdommen
Maer verlossen met mijn bloet
Ick begheer in v herte te weunen
Ende ter salicheyt brengen in
Soo moet ghy op my steunen
Oft ghy en compt niet daer ick ben.
Ick ben den wijnstock gheschoten
Spreeckt Christus verstaet mij woort
Blijft vast in my ghesloten
Ghy sult brenghen goede vruchten voort
Maer laet ghy v verleyden mede
Dat ghy des werelts trooste aensiet
Soo wordy vanden wijnstock ghesneden
En al u vruchten en dooghen niet.
Hebt lief ende wtuercoren
Die v ter werelt doen quaet
Die v boosheyt leggen te voren.
Bidt daer voor tis Christus raet
Want Godt heeft selue gesproken
Aent Cruyce met stemme verheuen
Och vader laetet ongewroken
Ick bidt v willet hun vergheuen
Wilt niet vreesen altesamen
Mijn woorden de werelt belijt
Oft ick sal my uwer schamen
Voor mijnen Vader ghebenedijt
Aldus en wilt niet vreesen
Maer strijdt met herten vro
| |
[pagina 136]
| |
Laet den knecht ghelijck den meester wesen
Het belieft den Sone alsoo
Ick ben een goet herder wter maten
Ick gae mijn schapen voor
Ick begheer mijn leuen daer voor te laten
Ick ben die rechte door
En laet v niet verleyden
Die buyten der deuren passeert
Het zijn dieuen en moordenaers beyde
Spreeckt Christus soo hy ons leert.
Niemant en compt tot den vader
Dan voor den soon Godts verheuen
Hy bidt voor ons alle gader
Om ons te bringhen int eewich leuen
Wilt dan op hem betrouwen
Hy is den verworpen steen
Doet ghijt niet het sal v berouwen
Als ghy van hier sult scheen.
Prince Godt siet ons allenden
Hier in dat aertsche dal
Wilt uwen gheest neder senden
Die ons vertroosten sal
Dat wy eere moghen bewijsen
Godt ende onse medebroeder,
Soo moghen wy mede verrijsen
Met Godt ende sijn lieue meder.
|
|