Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
op die wijse. O Radt van auontueren.Hoort hoe Christus na Galileen
Track, wt dat Iootsche lant
Om dat hem die Pharizeen
Benijden aen elcken kant
Door Samarien moeste hy wesen
Daer hy by een fonteyne quam,
Die Iacob (alsoo wy lesen)
Gaff Ioseph sijnen sone ghepresen
Daer Iesus sijn rusten nam.
Sijn discipulen ghetrouwe
Ghinghen synse coopen al tot Sychar
Een Samaritaensche vrouwe
Quam om water te putten daer
Want Iesus bleef daer alleyne
Ende hy sprack dat vrouken toe
Gheeft my wt ionsten reyne
Een droncxken waters cleyne
Want hy was van gaen soo moe.
| |
[pagina 133]
| |
Hoe begeert ghy van my dus Heere
Te drincken sprack tvrouken ient
Want die Ioden in gheenen keere
Den Samaritanen en comen omtrent
O vrouken sprack Christus verheuen
Kende ghy Godtd ghiften soet
Ghy sout hem om water aencleuen
Ende hy soude v water gheuen
Dwelck eewelijck leuen doet.
Wat water soude dit wesen
Sprack dat vrouken goedertier
Sijt ghy bouen Iacob ghepresen
Want hy haelde zijn water hier
Christus sprack hem sal noch dorsten
Die van dit water drinckt
Maer in wien mijn water mach rusten
Hem en sal niet meer drinckens lusten
Twelck int eewich leuen bringt.
Wilt my van dit water schincken.
Sprack tvrouken tot Christum san
Christus sprack wilt v bedincken
Ende roept tot my uwen man
Tvrouken sprack na Ioannes beschrijuen
Gheenen Man en heb ick soo ghy siet
Christus sprack om deucht te verstijuen
Ghy hebter ghehadt tot vijuen
En die ghy hebt is uwe niet.
Heer ghy zijt een Propheet
Sprack tvrouken hoort dit vermaen
Ghy segt my wat ick int secreet
Binnen my seluen hebbe misdaen
Waer moetmen Godt aenbeden
Op den berch oft te Ierusalem fijn
Segt my Heere vol wijsheden
| |
[pagina 134]
| |
Want hieromme die Ioden vol onvreden
Op die Samaritanen sijn.
Ghy en weet niet sprack die Heere
Wie ghy aenbidt oft vreest
Wie Godt bidt t’sijnder eere
Moet bidden inden Gheest
Doen sprack die Vrouwe vol vramen
Ick ghelooue dat ghy Messias sijt
Met dien sijn Discipulen quaen
Meester eedt seyden sy altesamen
Christus hadde anderen appetijt.
Het Vrouken is sonder sparen
Rasch na die Stadt ghegaen
Sy liep al omme openbaren
Ende haer Cruycke liet sy staen
Wat haer gheschiet was ginck sy ontknoopen
Als t’Volck dit hadde ghehoort
Het quam met grooten hoopen
Neerstich wt die stede gheloopen
Ende gheloofden aen Christum voort.
Ghy Christenen in allen hoecken,
Betrout in Christus naeckt
Wilt in hem v salicheyt soecken
Dats die spijse daer hy naer haeckt
Den ougst is nv voor ooghen
Die vruchten staen al wit
Wilt Christo liefde tooghen
Ende uwen naesten te helpen pooghen,
Op dat ghy sijn eewich rijck besidt.
|
|