Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
Op de wijse. O Radt van auontueren.Hoort toe ghy Kersten sinnen
En wilt niet sijn beswaert
Alle die Gods woort beminnen
So ons Ioannes verclaert
Int achste Cappittel beschreuen
Hoe Iesus smorghens vroech
Ghecomen is inden Tempel
Leerende T’volck met woort en exempel
Den Pharizeen spijttet ghenoech.
Die Pharizeen quaet van ghedachten
Voor Iesus op dat pas
Een Vrouken dat sy brachten
Die in ouerspel beunden was
Sy seyden dese Vrou is beuonden
In ouerspel met boosen gheschal
Dus hier ouer wilt vonnisse gheuen
In Moyses Wet staet gheschreuen
Datmen sulcke steenen sal.
Om Iesus tachterhalen
Hebben sy dese list gheleyt
Want hy met soeter talen
Altoos sprack van bermherticheyt
Om Iesum tondersoecken
Oft hy soude hebben gheseyt
| |
[pagina 131]
| |
Datmense soude steenen
Dit was haerlieder meenen
Dat en ware gheen bermherticheyt.
Christus die Heer vol weerden
Die booch hem neder saen
Ende schreef daer inder eerden
Wat sy selue hadden misdaen
Sy saghen daer tint ronde
Op malcanderen alle ghemeen
Hoort wat hen Christus oorconde
Die van v is sonder sonde
Die worpe den eersten steen.
Hier by moghen wy bedieden
Dat een yeghelijck wel verstaet
Sijn hueken suyuer sal wieden
Eer hy in eens anders gaet
En wilt gheen vonnisse gheuen
Daer ghy selue in schuldich sijt
Want sy saghen daer beschreuen
Haer misdaet dat sy hadden bedreuen
d’Welck ons d’Euangelie belijdt.
Die Pharizeen ghemeyne
Sijn altesamen wech ghegaen
Ende lieten daer alleyne
Het vrouken voor Christum staen
Christus al sonder sparen
Hy vraechde t’Vrouken saen
Waer dat sy waren gheuaren.
Al die haer quamen beswaren
En haer beschuldicht haen.
Heeft v iemant verdoemt van desen
Heeft Christus dat Vrouken ghevraecht
Och niemant Heere ghepresen
Sprack dat Vrouken seere versaecht
| |
[pagina 132]
| |
Soo en wil icki v niet verdoemen
Sprack tot haer Christus die Heer
En dient gheen vreemde afgoden,
Gaet leeft nae mijn gheboden
En sondicht voordaen niet meer.
Die bermherticheyt ons Heeren
Moghen wy hier by verstaen
Elck die hem wilt bekeeren
Als hy met sonden belaen
Wilt hy voort deuchdelijck leuen
Hy wordt van Christus bevrijdt
Maer en wilt gheen oordeel gheuen
Daer een ander om soude beuen
Op dat ghy oock niet gheoordeelt en zijt.
|
|