Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
[pagina 139]
| |
Hoort toe altesamen bidt ende waeckt
Want wy naer Gods beelde sijn gemaect
Ende wilt opheffen v ooghen
Want nv v den dach des Heeren naeckt
Dien druck moet elck gedoogen.
Het volck sal teghen malcander opstaen
Die Vader sal kint afgaen
Ende tkint den Vader versteken
Ghelijck voor die diluuie elck was belaen
Vol boosheyt ende vol ghebreken.
Als dan die boosheyt menichfout
Seyt Christus sal heben in ionck ende oudt
Die ouerhandt ghenomen
Die liefde sal worden in veel herten cout
Merckt of dit niet en is volcomen.
Wat doen wy al om daertsche goet
Dat in die werelt verrotten moet
Oft die motten sullen eten
Dat ons een dief steelt metter spoet
Daer wy Godt mede vergheten.
Christus ginck voor ons inde doot
Waer helpen wy malcanderen wter noot
Al hooren wy Christus leden karmen
Daer en is compassie in cleyn noch groot
Elck sluyt sijn borse voor den armen.
Noch siet ghy vande hoochste snel
Tot die neerste toe ist al rebel
Om deucht doen en wil niemandt pooghen
Ia Godt seyt, daer en doet niet een wel,
Sy worden al van my ghebooghen.
Wat dobbelen, tuysschen, wat ouerdaet
Wat hoouerdije is nv in elcken staet
In spijse in dranck in cleeren
Soo wtwendich dat het volck nv gaet
| |
[pagina 140]
| |
Men kent gheen schamel voor Heeren
Hoe moghen wy sijn dus seer verblent
Dat wy Gods liefde soo excellent
Om daertsche saken laten varen
Die ons niet en gheuen dan torment
En met die eewighe doot beswaren.
Wat mach den mensche baten, dat
Hy crijcht (seyt Christus) al tswerelts schat
Als hy sijn siele laet bederuen?
Al waert dat ghy duysent werelden hadt
Ten helpt al niet als ghy moet steruen.
Waer is Antiochus, waer mach hy sijn?
Holofernes ende Alexander fijn?
Die eens die werelt al verwonnen
Wat hebben sy daer aff op dit termijn
Vercreghen dan een hant vol sonnen?
Dus die werelt soo sint Ian v raet
Ende alle wereltlijcke saken gaet
Daer en leet niet in dan hoouerdije
Haet ende nijt, en ghiericheyt versmaet
E alle oncuyssche boeuerije.
Dus wilt v neerstelijck spoyen
Die leden Christi bystant te doen
Wt liefden die hant wtsteken
Van spijse van dranck, van cleeder, en schoen
Oft wat hun mach ghebreken.
|
|