Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
Op die wijse vant Liedeken van Munster.Adam was een verloren man
Groot leet heeft hy ons gedaen an
Dat wy allen berapen
Verloren heeft hy sijn edelheyt
Daer hy in was ghechapen.
Met Adams vleesch ben ick ghequelt
Alle mijn nature is my ontstelt
Adam ghy doet my steruen,
Ghy quelt mijnen gheest al totter doot
Mijn siel wilt ghy bederuen.
Die werelt compt met grooten gedrange
Mijn boose natuere maeket my so banghe
Die vyant wacht opt ramen
Oft hy die vre gheraken conde
Dat hy my mochte beschamen.
Keert weder keert weder o edel siel
Ghy hebt verloren dat schoonste prieel
Den Hemel met allen sijn losten
Ghy en compter waerlijck nemmermeer
Het sal v moeten costen.
Het sal v costen vleesch ende bloet root
Al waer fijn van goude die werelt groot
Ghy soudtse moeten deruen
Ende slaen den sondighen Adam doot
Oft ghy moet immers steruen.
Daer voor is Christus leuen goet
| |
[pagina 114]
| |
Het gheeft der sielen eenen goeden moet
Hy is voor ons ghestoruen
Den eewighen doot maect hy te niet
Die helle heeft hy bedoruen.
Door Godts woort comt ons veel deucht
Ende naer die siele teucht en vreucht
Men vindt claer beschreuen
Wie met die wercken in Godt ghelooft
Die heeft dat eewich leuen.
Sijt ghy dan een Kersten man
Soo neempt een Kersten leuen an
Weest vroom ende onuerslaghen
Sijn iock is soet, sijn laest is licht
Hy wilt ons helpen draghen,
Weest vrolijck in uwen wederspoet
Daer toe doet allen uwen vyanden goet
Doet vruchten in uwen daghen
Ende staet uwen armen broeder by
Soo sult ghy Godt behaghen.
Aldus heeft ons Christus voor ghedaen
Condt ghy de schriftuere wel verstaen
In woorden ende oock in leuen
Soo siet Christus lustich exempel aen
Het en sal v niet begeuen.
Gheeft Godt onse Heere eenen lof jent
Dat hy de waerheyt ons maeckt bekent
Door sijn gheest van bouen
Verleent daer toe oock sijn Kinders playsant
Dat sy hem eewich louen.
Prince wilt Godt dienen soot behoort
En gaet altijts in duechden voort
Ende wilt v daer toe keeren,
Wat ghy uwen euen naesten doetg
Dat doet ghy onsen Heere.
|
|