Het oudt Huysken van Bethleem

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

Een nieu Leysen.

op die wijse. Quem nunc virgo

Laet ons met herten sinnen
Louen die wy beminnen
Met vreuchden op desen tijdt
Die Coninck is des werelts wijt

[p. 65]

 

Laet ons hem wieghen

 

Laet ons hem wieghen

 

Wieghen wieghen wieghen.

 

Een Soon is ons ghegheuen

 

Als wy waren verloren

 

En om ons sondich leuen

 

Is ons een Kindt gheboren                        Laet.

 

Sijn hoofdeken teer en cleyn

 

Is ghevuest bouen maten schoon

 

Als int claer gout ghesuyuert reyn

 

Hy die daer is der deuchden loon.                        Laet.

 

Sijn oochskens lichten alte wel

 

Claerder dan die Sonne oft Maen

 

Welck schijnen bouen maten snel,

 

Hy wilde voor ons sijn ontfaen                        Laet.

 

Sijn Mondeken met poosen

 

Bloset seer lieflijck en root

 

Als die Prouencie Roosen

 

Daer hy met suycht de borstkens bloot.                        Laet.

 

Tot ons oock sijns herten gront

 

Brandt wt een liefde groot

 

Om ons te helpen tallen stont

 

Wt der sielen grooten noot.                        Laet.

 

Sijn armkens staen op seer soet

 

Om ons tontfaen en bewaren

 

Als een Clock-hin met haer Vleughels doet

 

Om haer Kiecxkens te vergaren.                        Laet.

 

Sijn Voetkens sijn ghereet te gaen

 

Al tot ons salichmakinghe

 

Als een vriendt, om ons vyandt te slaen

 

En dooden ons verdoeminghe.                        Laet.

 

Welck werck des salicheden

 

Hy sal wercken met sijn bloet

 

Als een Pellikaen besneden

[p. 66]

 

Tot het leuen sijn joncxkens doet.                        Laet.

 

Noyt gheen liefde so groot

 

En is door eenich mensch gheschiet

 

Tot Godt, oft tot s’vrienden noot

 

Tsy in perickel oft verdriet.                        Laet.

 

Gaet naer Bethleem terstont

 

Om hem te groeten wilt vlieghen

 

En te cussen aen sijnen mondt

 

En wt herten te wieghen.                        Laet.

 

Want als hy was gheboren

 

Heeft om ons allen gheschreyt

 

Om dat wy waren verloren

 

En tot die boosheyt gheleyt.                        Laet.

 

Singt, wiecht, paeyt hem int ghemeene

 

Wiecht ende segt, Kindeken sus,

 

Weet toch niet laet my weene

 

Swijcht toch Kindeken Iesus.                        Laet.

 

Looft dan o siele hierom

 

Gheeft nv lof en prijs en eer

 

Vwen gheboren bruygom

 

Want hy is Godt ende Heer.                        Laet.