Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
[pagina 63]
| |
Laet ons dit Kindeken louen altijt.
En eeren sijn Moeder ghebenedijt.
Die Herderkens opden Velde waren
Sy waecjten haer cudden sonder beswaren
Laet ons dit Kindeken louen altijdt
En eeren sijn Moeder ghebenedijt.
Den Enghel des Heeren quam by hem staen
En heeftse met Gods claerheyt omvaen
Laet ons. etc. En eeren. etc.
Hy sprack en wilt niet vreesen nv
Een blijde bootschap brenghe ick v
Laet ons, etc. En eeren. etc.
V lieden is heden gheboren teer
Den salichmaker Christus die Heer
Laet ons etc. En eeren. etc.
Te Bethleem in Dauids stadt
Die sal v wesen een teecken plat
Laet ons. etc. En eeren. etc.
Daer suldy vinden een Kindeken cleyn,
Int cribbeken ligghen in doecxkens reyn
Laet ons. etc. En eeren. etc.
Die Enghelen songhen met soeten thoon
Glorie sy Godt inden hoochsten throon
Laet ons. etc. En eeren. etc.
Die Herderkens spraken malcanderen aen
Laet ons naer Bethleem gaan seer saen
Laet ons. etc. En eeren. etc.
Laet ons besien d’woort onghewoont
Dat ons die Heere heeft ghethoont
Laet ons, etc. En eeren. etc.
Sy hebbent Kindt inde cribbe gheuonden
By sijnder Moeder in doecxkens ghewonden
Laet ons. etc. En eeren. etc.
Sy hebbent vercondicht en seydent voort
| |
[pagina 64]
| |
Sy waren verwondert diet hebben ghehoort
Laet ons. etc. En eeren. etc.
Maria bewaerde dese woorden al
Sy ouerleyse in haer herte sonder gheschal
Laet ons. etc. En eeren. etc.
Die Herderkens wederom met dien
Sy loofden Godt van al, dat sy hadden ghesien
Laet ons. etc. En eeren. etc.
Ten achsten daghe so dat betaemt
Wert Kindt besneden en Iesus ghenaemt
Laet ons. etc. En eeren. etc.
Iesus wou gheboren sijn in dit dal,
Om ons te verlossen van Adams val,
Laet ons. etc. En eeren. etc.
Het Helsche Serpent heeft Iesus vertreden
Dat Eua int Paradijs hadde bestreden
Laet ons. etc. En eeren. etc.
Hel, Duvel, en Doot heeft Iesus verwonnen
Aent Cruyce met sijnen Bloede beronnen
Laet ons. etc. En eeren. etc.
Den bitteren doot is Iesus ghestoruen
Aenden Vader voor ons ghenade verworuen
Laet ons. etc. En eeren. etc.
Aent houte des cruyce heeft Iesus koen
Ons ghegheuen sijn seluen voor een rantsoen
Laet ons. etc. En eeren. etc.
Nv bidden wy Iesus met herten verheuen
Dat hy ons wilt gheuen dat eewich leuen
Laet ons. etc. En eeren. etc.
|
|