Het oudt Huysken van Bethleem
(1590)–Hendrik de Coster–
Auteursrechtvrijmet vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus
opden thoon, Die de werelt iet wel besiet.Comt al mediteren
Ende Contempleren
In Iesus gheboorte zoet,
Gaet tot Bethleem recreeren,
Ende iubileren
Ghy sult daer vinden alle goet
Treckt derwaert inden geest al metter spoet
Inwendich inder zielen v verblijt
Looft Godt den Heere ghebenedijt
Een Kindeken inder crebben,
Gheen schoonder en condy hebben
| |
[pagina 67]
| |
Dan ons en wort gegeuen nv
Van couwen zijn ledekens beuen,
Wilt hem v herteken geuen
Het leyt en weent ende wacht naer v
Offert hem v sonden met groot beru
Inwendich inder sielen etc.
Glorie inden troone,
Songen die Ingelkens schoone
Doen Iesus geboren was
Die Herders die by haer schaepen
Hadden ligghen slaepen,
Zy waeren verwondert op dat pas
Sy liepen al met blyschap naer Bethleem ras
Inwendich inder zielen etc.
Maria sijn lieue Moedere
Met Ioseph zijnen hoedere,
Waeren beyde zeer verblijt
Door haer ghelooue sy kinden
Het Kint d’welck sy beminden,
Te wesen Godt ghebenedijt.
Sy hadden in haer herte een groot iolijt
In wendich inder zielen.
Loff Kindeken van acht daghen,
Ghy hebt willen draghen,
De groote pijne vander wet.
In v ledeken teere
Wordy besneden Heere
Voor ons die met sonden waren besmet.
Salich is de mensche die hier op let.
Inwendich etc.
Dit suyuer Kindeken cleyne
Soeckt die hertekens reyne
Die hy al te zeer bemint.
Syn cleyn oogskens leken
| |
[pagina 68]
| |
Om onse ghebreken
Is Godt almachtich gheworden een Kint,
Deuote hertekens dit versint,
Inwendich inder zielen v verblijt,
Looft Godt den Heere ghebenedijt.
Wilt in der zielen smaeke
Dese groote saecken
Dat Godt almachtich was een Kint
In zijn lefde suldy blaecken:
En naer dit Kindeken haecken,
Want hy v altijt heeft bemint.
Binnen in v herteken dit doch print
Inwendich inder zielen etc.
En laet ons nu niet trueren,
Dit Kint mach ons ghebeuren
Gods in zijnder menscheyt schoon.
Wilt met herten stille
Doen des Kindekens wille,
Hy sal selue wesen onsen loon.
Als heden heeft hy ons ghedaen den toon,
Inwendich inder. etc.
O Kindeken wilt v smerte
Toch printen in mijn herte
Door v groote ghenade goet.
Wilt tot deser stonden
Vergheuen alle mijn sonden
Door v preciose bloet,
Heere in v verdiensten neme ick moet,
Inwendich inder zielen etc.
Laet ons den tijt besteden,,,,,,
Godt inden Gheest aenbeden
Hier beneden int aertsche dal.
Al is dit Kindeken teere.
Het is den seluen Heere
| |
[pagina 69]
| |
Die ons allen oordeelen sal
Wilt dit Kint toch vreesen bouen al
Inwendich inder zielen v verblijt,
Loft Godt den Heere ghebenedijt
|
|