Het oudt Huysken van Bethleem

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

[p. 56]

Een schoon Leysen en lof tot het Kindeken Iesus.

opden thoon van de Alemande, Coler ne puis mon affaire, &c.

Lof Kindeken Iesus mijn wtuercoren,
Als desen nacht voor ons gheboren.
Sonder v wy waren verloren,
En ghebleuen in s’Vyandts macht.
Ghy hebt versoent des Vaders toren
Daer de sonde ons hadde in ghebracht.

Lof Kindeken Iesus jonck van daghen,

V alleene doet my behaghen,
Wilt wt mijnder herten iaghen
t’Ghene dat v gracie in my belet.
Naer niemant anders en wil ick vraghen
Des werelts liefde de siel besmet.

Lof Kindeken Iesus teer en cleene,

Al zijdy mijn lieueken alleene,
So moet ick v troetelen int ghemeene,
Want tot een yeghelijck zijdy bereydt
Voor de sondaers die hen schult beweenen
Ligdy in de cribbe en schreyt.

Lof Kindeken Iesus col caritaten

Om v wil ick de werelt laten,
Ende alle sonden haten
Die my daghelijcx doen ghewelt.
V te beminnen sal mijn ziele baten,
Ick heb mijn herteken op v ghestelt.

Lof Kindeken Iesus proper en schoone

Ghecomen van bouen wt s’Hemels troone,
Compt binnen in mijn herteken woone
Want ghy zijt den liefsten gast.
Gheeft my v seluen tot eenen loone,
Mijn ziele is Heere op v ghepast.

Lof Kindeken Iesus vol van minnen,

Leert my mijn ghebreken kinnen,

[p. 57]

 

Dat ick die mach altijt verwinnen

 

Door v gracie in deser tijdt,

 

Regeert mijn herte en mijn vijf sinnen,

 

Mijn Heere, mijn Godt ghebenedijt.

 

V ootmoedicheyt sal ons leeren,

 

Hoe dat wy ons moeten bekeeren,

 

Willen wy comen in Hemelrijck,

 

Als cleyne kinderen ons verneeren

 

In simpelheden alle ghelijck.

 

Lof Kindeken Iesus van groote weerden

 

Die ons arm menscheyt wilde aenueerden

 

Ende by ons comen op deser eerden,

 

Om ons te helpen wter noot.

 

Wy willen v dancken als leuede geerden,

 

Ende v dienen totter doot.

 

Lof Kindeken Iesus Coninck verheuen,

 

Den naem is v inden Hemel ghegheuen,

 

Voor v Maiesteyt die Enghelen beuen,

 

Ende singhen Sanctus tot alder tijt,

 

Laet my v dienen alle mijn leuen,

 

Tot penitentie gheeft my respijt.

 

Lof Kindeken Iesus groot van machten,

 

Stort in mijn herteken goede ghedachten

 

Dat ick v toecomste mach verwachten

 

Hier beneden int aertsche dal.

 

Als ghy sult comen met uwe crachten

 

Oordeel gheuen ouer al.

 

Lof Kindeken Iesus cleyn besneden

 

In v teere schamel leden,

 

Laet my den tijt hier so besteden

 

Tot uwer eeren in s’werelts pleyn,

 

Dat ick v mach offeren hier beneden

 

Een rouwich herte van sonden reyn.

[p. 58]

 

Lof Kindeken Iesus lief ghepresen

 

V weelden sijn by ons te wesen

 

Alle mijn sonden wilt ghenesen

 

O alder opperste Medecijn,

 

Cureere mijn wonden bid ick met desen

 

Doet my naer uwen wille sijn.